Beıimdik dene shynyqtyrý men sport múmkindigi shekteýli balalardyń júıeli jattyǵýyna, shynyǵýyna jaǵdaı jasap, ózdiginen áreket etýge bastaıdy. Mundaı balalardyń táýelsiz bolýyna, ózin ózi baǵalaý jáne kommýnıkatıvti daǵdylaryn arttyrýǵa septigin tıgizetin is-sharalardy ilgeriletý úshin óńirlerde «Salamatty bolashaq» áleýmettik jobasy qolǵa alynǵan. Igi bastamaǵa «Samruk-Kazyna Trust» áleýmettik jobalardy damytý qorynyń qoldaýymen «Teń múmkindikter álemi» qoǵamdyq qory muryndyq bolyp otyr.
Kez kelgen sport túrin múmkindigi shekteýli jandarǵa beıimdeýge bolady. Mysaly, atalǵan joba aıasynda beıimdik karate, beıimdik júzý, beıimdik taekvondo, bochcha, golbol, ınklıýzıvti horeografııa boıynsha Nur-Sultan qalasynda sport úıirmeleri ashylyp, oǵan 160 bala qatysady. Onyń ishinde múmkindigi shekteýli balalarmen qatar saý balalar da bar. Sondyqtan bul tásil ınklıýzıvti dep atalady.
«Teń múmkindikter áleminiń» dırektory Nurgúl Uljekova beıimdik sport, eń aldymen, densaýlyǵynyń múmkindigi shekteýli nemese psıhıkalyq aýytqýshylyǵy bar sportshynyń shama-sharqynsha maksımaldy múmkindikterge jetýge tyrysatyn jáne óziniń sporttyq tehnıkasyn jetildiretin básekeli áreketi ekenin atap ótti. Onyń aıtýynsha, 2019-2020 jyldary joba sheńberinde atqarylǵan jumys jattyǵýlardyń tıimdi bolǵanyn kórsetti. Atap aıtqanda, jas sportshylardyń 97%-nyń koordınasııalyq qabiletteri jaqsardy, 95%-y tózimdilik, 75%-y ıkemdilik kórsetkishterin jaqsartty. Balalardyń 65%-nyń kúshi artyp, 54%-nyń eptiligi damydy. Jobanyń kóptegen qatysýshysy halyqaralyq jarystarǵa qatysyp, júldeli oryndardy ıelenip jatyr.
Ata-analar da óz balalarynyń áleýmettik daǵdylary jaqsarǵanyn baıqady. Balalar kópshil jáne táýelsiz bola bastady. Sondaı-aq balalardyń zeıini ashylyp, tártibi jaqsaryp, este saqtaý, tipti sóıleý qabiletteri artty.
«Meniń ulyma aqyl-oıdyń artta qalý dıagnozy qoıylǵan. Biz eki jyl boıy adaptıvti taekvondo men bochcha seksııalaryna qatysamyz. Nátıjesi keremet. Bul onyń sporttyq damýyna ǵana emes, jalpy jaǵdaıyna da qatysty. Ol belsendi, muqııat boldy. Jaqynda balam 15 mınýt ishinde qurlyqtar men muhıttardy jattap aıtyp, bárimizdi tańǵaldyrdy. Munyń biz úshin úlken jetistik ekenin senimdi túrde aıta alamyn», deıdi 14 jasar Narımannyń anasy Anar.
Talaı janǵa jiger bergen jobanyń aıasy da keńeıip jatyr. Bıyl qyrkúıekten bastap «Salamatty bolashaq» elimizdiń barlyq aımaǵyna tarala bastady. Búginde bul baǵytta Qaraǵandy oblysynda, Pavlodar men Shymkentte beıimdik, ınklıýzıvti sport úıirmeleri ashyldy.
Mundaı úıirmelerdiń ashylýyna kóbine erekshe balalardyń ata-analary bastamashy bolyp jatady. BAQ jáne áleýmettik jeliler arqyly jobanyń sátti júzege asyp jatqanyn baqylap otyrǵan otbasylar beıimdik sport túrleri boıynsha bólimder ashýdy ótinip, jergilikti atqarýshy organdardan kómek surap, hat jazady. Mysaly, Pavlodardaǵy seksııalar aýtızmmen aýyratyn balalardyń ata-analary bastamasymen jáne «Shekarasyz álem» ÚEU-nyń suraýy boıynsha ashyldy. Búginde Pavlodarda ashylǵan adaptıvti júzý, ınklıýzıvti horeografııa, adaptıvti fýtbol jáne bochcha seksııalaryna 50 bala qatysady.
Sondaı-aq seksııalardyń ashylýyn trenerler de quptap otyrady. Qaraǵandy oblysynyń Jańaarqa aýdanynda ornalasqan S.Seıfýllın atyndaǵy orta mekteptiń bochcha seksııasyna múmkindigi shekteýli 10 oqýshy qatysady. Bochcha seksııasynyń jattyqtyrýshysy – osy mekteptiń dene shynyqtyrý muǵalimi Qasym Asylan. Ol beıimdik dene shynyqtyrý boıynsha Halyqaralyq ǵylymı-praktıkalyq konferensııaǵa qatysqannan keıin osy sport túrine qyzyǵýshylyq tanytty. Buǵan qosa Qaraǵandyda ınklıýzıvti horeografııa, beıimdik júzý, bochcha jáne beıimdik taekvondo seksııalary jumysyn bastady.
Sondaı-aq Shymkentte 20 balany qamtıtyn adaptıvti dzıýdo, bochcha seksııalary ashyldy, jaqynda adaptıvti júzý men adaptıvti fýtbol seksııalary da jumysyn bastamaq. Bul rette Almatyda qurylatyn bochcha seksııasyn da atap ótken jón.
Atalǵan bastama boıynsha aldaǵy ýaqytta aýqymdy jumystar josparlanyp otyr. Bastamashylar joba aıasynda sportshylardyń sanyn 560-qa deıin jetkizýdi, beıimdik dene shynyqtyrý boıynsha kem degende 40 mamannyń biliktiligin arttyrýdy jáne beıimdik sport túrlerin árbir erekshe balaǵa múmkindiginshe qoljetimdi etýdi kózdeıdi.
