Saqtandyrylǵan qazaqstandyqtarǵa emhanalarda emdelý, dárigerlerge qabyldaýǵa barý, zerthanalyq qyzmetter, dıagnostıka, sondaı-aq dári-dármekter qoljetimdi. MÁMS esebinen pasıentter densaýlyǵyn aýrýhanalarda emdeı alady.
Sondaı-aq, mindetti medısınalyq saqtandyrý júıesine qatysýshylar úshin joǵary tehnologııalyq medısınalyq qyzmetter, ıaǵnı kúrdeli biregeı operasııalar qoljetimdi. Pallıatıvtik kómek te kórsetiledi. Emdelmeıtin, ómirge qaýip tóndiretin jáne aýyr ótetin aýrýlary bar pasıentterdi qoldaý da osy qyzmetke kiredi.
Budan basqa, medısınalyq saqtandyrý júıesi boıynsha muqtaj adamdarǵa meıirbıke kútimi usynylady.
Áleýmettik medısınalyq saqtandyrý júıesine qatysý úshin mindetti medısınalyq saqtandyrý qoryna (ÁMSQ) aýdarymdar qajet, ony ne jumys berýshi, ne derbes tóleýshiler tóleıdi. Osylaısha, 2020 jylǵy 1 qańtardan bastap jumys berýshiler árbir qyzmetkerdiń tabysynan 2% , JK - 1,4%, azamattyq-quqyqtyq sharttar boıynsha jumys isteıtin adamdar - tabysynan 1%, qyzmetkerler-tabysynan 1%, derbes tóleýshiler-1 ETJ-den 5% saqtandyrý qoryna aýdarýy tıis.
Mártebeni resmı qyzmetter arqyly ÁMSQ saıtynan fms.kz, "Qoldau 24/7" mobıldi qosymshasynan, Saqtandyru-bot Telegram-nan tekserýge bolady. Barlyq júıeler durys jáne ashyq jumys isteıdi.
Qoldau 24/7 qosymshasyn júktep alyp, ótinish, alǵys, usynys qaldyrýǵa, sondaı-aq Mindetti áleýmettik medısınalyq saqtandyrý jáne medısınalyq qyzmet kórsetý máseleleri boıynsha keńes alýǵa bolady.
"Búgingi tańda mobıldi qosymshany júktep alý sany 117 myńnan asady, barlyq ótinishterdiń 50%-dan astamy mobıldi qosymsha arqyly kelip túsedi, bul 1406 baılanys ortalyǵyna júktemeni azaıtýǵa múmkindik beredi", - dep atap ótti Nur-Sultan qalalyq ÁMSQ fılıalynyń baspasóz qyzmetinde.
Kún saıyn negizgi máseleler boıynsha azamattardan 1800-den astam ótinish kelip túsedi. Saqtandyrý mártebesin tekserý, TMKKK jáne MÁMS kiretin qyzmetter boıynsha, medısınalyq uıymǵa tirkeý boıynsha MÁMS tólemderin tóleý tásilderi men mólsherleriniń máseleleri jáne t. b. suraqtar boıyesha habarlasady.
Halyqty qyzyqtyrǵan máselelerge jedel áreket etý úshin Qoldau 24/7 arqyly ótinishterge turaqty monıtorıng júrgiziledi. Barlyq ótinishter reglamentke sáıkes 1-den 5 jumys kúnine deıin óńdeledi.
"MÁMS máseleleri boıynsha halyq habardar bolý úshin, qosymshanyń fýnksıonaly qosymsha keńeıtildi. Osylaısha, "saqtandyrylý mártebesi" bóliminde tólemder boıynsha aqparat tolyqtyryldy, TOP 10 jıi qoıylatyn suraqtar da engizildi", - dep túsindiredi mamandar.
Qazirgi ýaqytta qoldau 24/7 mobıldi qosymshasy arqyly jeńildikti sanattaǵy adamdarǵa (BJT tóleý sebebi boıynsha jeńildikti sanattan túsip qalǵan) ýaqytsha saqtandyrylý mártebesin berý boıynsha jumys júrgizilýde.
Sondaı-aq, Qoldau 24/7 mobıldi qosymshasy arqyly karantın kezinde MÁMS jarnalary men aýdarymdaryn tóleýden bosatylǵan ShOB uıymdarynyń qyzmetkerlerine saqtandyrý mártebesi beriledi.
Eseptik kezeńde ShOB 3321 jumyskerine saqtandyrý mártebesi berildi.
Esterińizge sala keteıik, MÁMS aıasynda qyzmet kórsetý boıynsha barlyq suraqtar men shaǵymdardy 1406 tegin nómiri boıynsha áleýmettik medısınalyq saqtandyrý qorynyń call-ortalyǵyna jiberýge bolady. Sondaı-aq ótinishti https://t.me/SaqtandyryBot telegram-botta qaldyrýǵa bolady.
