S.Shapaǵatov 1940 jyly Túpqaraǵan aýdany, Telman aýylynda dúnıege kelgen. Qazaq taý-ken metallýrgııa ınstıtýtyn jáne Máskeý munaı-gaz ónerkásibi ınstıtýtyn bitirgen. Ol aımaqtaǵy munaı jáne gaz óndiretin kásiporyndarda jumys istep, qarapaıym munaıshydan qoǵam qaıratkerine deıin ósti. Shapaǵatov "Parasat" qoǵamdyq-saıası demokratııalyq qozǵalysynyń negizin qalaýshy jáne jetekshisi boldy. Onyń basshylyǵymen alǵashqy qazaq mektebi men balabaqshasy ashyldy. Shevchenko qalasynan burynǵy ataýy qaıtarylyp, Aqtaý qalasy boldy. Mańǵyshlaq aımaǵy Mańǵystaý bolyp ózgertildi. Ol sondaı-aq Mańǵystaý oblysynda munaı-gaz ken oryndaryn ıgerýge jáne damytýǵa aıtarlyqtaı úles qosty.
Eske alý sharasy qoǵam qaıratkeri murajaıynyń saltanatty ashylý rásimimen jalǵasty. Murajaıda S.Shapaǵatovtyń paıdalanǵan jeke zattary, fotosýretteri , qujattary, otbasylyq arhıvten alynǵan zattary jınaqtalǵan. Merekelik shara barysynda S. Shapaǵatovtyń ómiri men eleýli eńbek jolyna arnalǵan "Saıyn dalanyń saıypqyrany" atty qoǵamdyq-saıası, tarıhı-tanymdyq jańa jýrnaldyń tusaýkeseri ótti. Oqyrmanǵa jol tartqan jınaqqa zııaly tulǵamen murattas, qanattas, úzeńgiles bolǵan azamattardyń, qalamgerlerdiń esseleri, zertteý maqalalary, estelikteri men onyń janashyrlyq qamqorlyǵyn kórgen jandardyń lebizderi toptastyrylǵan.
Oblys ákimi S.Trumov týǵan ólkeniń ósip-órkendeýine, ulttyq mádenıettiń jańǵyrýyna qosqan úlesin erekshe atap ótti.
"Saıyn Nádiruly – zamanynyń aldyńǵy qatarly ozyq oıly tulǵasy atana bilgen Nádir aqsaqaldyń ónegeli jolyn jalǵastyrǵan, ata-babanyń arýaǵyn, qadir-qasıetin asqaqtaı bilgen birtýar tulǵa boldy. Ardaqty el aǵasy, ult patrıoty qazir aramyzda joq bolsa da, onyń el úshin atqarǵan eren eńbegi, ıgi isteri, ónege-ósıeti men muralary halqyna, urpaqqa mıras bolary sózsiz", dedi oblys ákimi.
