Atalǵan bý qazandyǵynyń jylý energııasyn qaladaǵy 197-i kóp qabatty úı, 5 balabaqsha, 10 medısınalyq mekeme, barlyǵy 763 nysan tutynady. Jylý qazandyǵy gazben jylytylady, rezervtik otyn retinde 644 tonna mazýt alynǵan. Jylytý qazandyǵy 10 qazanda tolyq iske qosylmaq. Aımaq basshysy daıyndyq jumystaryn der kezinde aıaqtap, qala turǵyndaryn ýaqtyly jylýmen qamtýdy qatań tapsyrdy.
Munan keıin G.Ábdiqalyqova Á.Bókeıhanov kóshesinde "Nurly jer" baǵdarlamasy aıasynda júzege asyrylyp jatqan ÝT-15A magıstraldy jylý jelilerin qaıta qurý jobasyn nazarǵa aldy. Uzyndyǵy 1 567 metr jylý jelisin "Avangard" JShS qaıta júrgizýde.
"Pandemııa ýaqytynda biz turǵyndardyń densaýlyǵyna asa mán berýimiz qajet. Qazirgi ýaqytta kún sýyp keledi. Sondyqtan qala halqyna der kezinde jylý berip, olardyń "tumaý" sekildi aýrýlarǵa shaldyǵýynyń aldyn alaıyq. Ol úshin merdiger mekeme osy jumysty 10 qazanǵa deıin aıaqtap, qalalyqtardyń tońbaýyna jumys jasaýy tıis", dedi óńir basshysy.
Sondaı-aq oblys ákimi №15 Avtonomdy blokty-modýldi qazandyǵynyń jumysyn da kórdi. "Araı-2" shaǵyn aýdanynda ornalasqan "Qyzylordajylýelektrortalyǵyna" qarasty qazandyq 2015 jyly paıdalanýǵa berilgen. Qazandyq osy aýdandaǵy 19 kópqabatty úıdi jylýmen qamtamasyz etedi.
Syrdarııanyń sol jaǵalaýyndaǵy úılerdi jylýmen qamtamasyz etetin avtonomdy blokty-modýldi qazandyǵynyń qurylysy da 15 qazanǵa deıin tolyq aıaqtalady dep josparlanýda. Búginde syıymdylyǵy 2 dana sý qoımasynyń qurylys-montaj jumystary, qazandyqqa qajetti joǵarǵy qysymdy gaz qubyrlaryn, aýyz sý qubyrlaryn tartyp, qazandyqty montajdaý, ǵımarattyń ishki bólmelerin salý, morjalarynyń montajdaý jáne ishki qubyrlaryn júrgizý jumystary júrgizilgen.
Kelisimshart boıynsha qurylysty aıaqtaý jeltoqsan aıy dep belgilengenmen, merdiger mekeme jylý maýsymynyń bastalýyna deıin jumysty tolyq oryndaıtyndyǵyn jetkizdi. Aımaq basshysy qazandyq qurylysyn sapaly aıaqtap, sol jaǵalaýdaǵy 32 kópqabatty úı men 2 áleýmettik nysandy der kezinde jylý júıesine qosýdy tapsyrdy.
Oblys ákimi G.Ábdiqalyqova "Qyzylordajylýelektrortalyǵyna" da bardy. Ortalyqtyń bıylǵy jylytý maýsymyna negizgi jabdyqtaryn daıyndaý maqsatynda "Jumyspen qamtý 2020 Jol kartasy" baǵdarlamasy sheńberinde 1022 mln. teńge bólindi. Osynyń arqasynda 156 adam jumysqa ornalasty. Atalmysh jylýmen jabdyqtaý aımaǵynyń jylý energııasyn 995 nysan tutynady. Onyń ishinde 365 kópqabatty úı, 29 mektep, 13 balabaqsha, 9 medısınalyq mekemeni jylýmen qamtamasyz etedi. Sonymen qatar, qýattylyǵy 113,2 Mvt elektr energııasyn óndiredi.
Aımaq basshysy budan ári salynyp jatqan 200 orynǵa arnalǵan modýldik úlgidegi juqpaly aýrýlar aýrýhanasynyń qurylysymen tanysty. Aýrýhana qazan aıynyń sońyna deıin tolyq iske qosylady dep josparlanǵan. G.Ábdiqalyqova pandemııa ýaqytynda emdeý memekeleri barlyq jaǵdaıǵa daıyn bolyp, esh bosańsýǵa bolmaıtynyn eskertti.
