Bir ókinishtisi, paraqorlyq, qylmysty jasyryp, jaýyrdy jaba toqý, tanymastaı ózgergen adamı bolmys, urda-jyq minez-qulyq qalypty sanalatyn búgingi ómirimizde dál osyndaı tragedııalar men dramalar az emes. Kóp kókeıine oı salarlyq týyndynyń ekranǵa shyǵarylýyn Ulttyq kınony qoldaý memlekettik ortalyǵy maquldady.
Fılmniń negizgi oqıǵasy sotta ótedi. Bas keıipkeri 60 jastaǵy Aıǵalı atty azamat. Onyń áıeli men balasyn sol qaıǵyly kúni kóligine mas kúıinde mingen 25 jastaǵy Dýman atty jigit qaǵyp óltirgen. Dýmannyń ata-anasy – aýqatty jáne baı adamdar bolǵandyqtan, sotqa para berip, balasyn jazalaýdan aman alyp qalý olarǵa sóz emes. Kisi óltirgen adamdy aqtap shyqqan úkimmen kelispegen Aıǵalı sot zalynda qaltasyna tyǵyp ákelgen granatany shyǵaryp, onyń caqınasyn sheship, zalda otyrǵandardyń bárin kepilge alady da, satqyn sot pen prokýrorǵa jáne qylmyskerge qatysty ádil úkim shyǵarýdy talap etedi. Ashý-yza kernegen Aıǵalı Dýmandy ıen dalaǵa aparyp, óltirýge bel býady. Áıtse de bir tylsym kúsh olardyń endigi sheshimine qarsy turady...
«Bul fılmde biz qandaı da bir suraqtarǵa jaýap bere alamyz dep oılamaımyn. Kerisinshe, biz munda kóp suraq qoıamyz. Osyndaı jaǵdaıǵa tap bolǵan adam ne isteýi kerek? О́z betimen jazalaý ádildikke jata ma? Qoǵam adamdy túsinýi úshin, adamnyń ózi qandaı bolýy tıis? Qaıtalap aıtaıyn, bul jobanyń ssenarısi ári rejısseri retinde men suraqtarǵa jaýap bermeımin, men bul fılmimmen suraq qoıamyn», deıdi fılm rejısseri Dáler Murzaǵalıev.
Qazirgi ýaqytta fılm avtorlary kastıng ótkizý jumystaryn pysyqtap jatyr. Ekinshi rólderge akterler izdeıdi, oǵan debıýtanttardy da qabyldaýy múmkin. Basty róldi akter Erjan Jarylqasynov somdaıdy. Avtorlar bas keıipkerdiń qaıǵy-qasiretin, kúıigin osy akter jaqsy jetkize alatynyna senimdi. Uıymdastyrýshylardyń aıtýynsha, ssenarıı qazaq tiline aýdarylyp jatyr. Aldaǵy ýaqytta fılminiń túpnusqasy qazaq tilinde shyǵady. Biraq beıneli sóz órnekteriniń tutastyǵy, mánerligi keıingi fılmderde saqtala bermeıtindigin, shalaǵaı sóz tirkesteriniń órip júretinin eskersek, aýdarma jumysynyń jaýapkershiligi óte mańyzdy bolmaq.
«Bul qysqametrli fılm bolǵandyqtan, biz úlken prokatqa shyǵaratynymyzǵa kúmándimin. Negizgi josparymyz retinde birinshi jyly – festıvalderge, ekinshi jyly – arnaıy kórsetilimderge qatysýdy oılap otyrmyz. Al fılmniń sońǵy kórsetilim orny YouTube arnasy bolady. Osy jospar boıynsha júrsek, tamasha bolar edi», dep atap ótti Dáler Murzaǵalıev.
