Biraq munymen saladaǵy qordalanǵan máseleniń bári tolyq sheshile qoımaıdy. Sol sebepten túıinder birtindep tarqatylyp jatyr. Sonyń dálelindeı, ótken aptada oblystyq medısınalyq jedel járdem stansasy sheteldik 22 kólikpen tolyqty. Zamanaýı avtokólikter naýqasqa alǵashqy kómek kórsetýge arnalǵan qajetti qural-jabdyqtarmen tolyq qamtamasyz etilipti. Jańa kólikter eki sanatqa bólingen. «S» sanatyna jatatyn 13, «V» sanatyndaǵy 9 «Hıýndaı N350» markaly medısınalyq jedel járdem kóligi «Jol kartasy» aıasynda satyp alynyp otyr.
– Koronavırýspen kúres kezinde dárigerlerimiz qajyr-qaıraty men eseli eńbegin kórsetti. Bul – erlikke bergisiz eńbek. Pandemııanyń birinshi kezeńinen úlken sabaq aldyq. Kemshiliktiń ornyn toltyryp, qaýipti indettiń ekinshi kezeńine daıyndyqty tııanaqtadyq. Oblysta dári-dármek pen qural-jabdyqtar jetkilikti. Dárigerlerimiz mol tájirıbe jınady. Densaýlyq saqtaý mınıstrliginiń qoldaýymen óńirdiń densaýlyq salasy 22 medısınalyq jedel járdem kóligimen tolyǵyp otyr. Endi aldaǵy qarashada taǵy da 18 medısınalyq jedel járdem kóligi jetkiziledi. COVID-19 pandemııasy ulttyń saýlyǵyn saqtaýdyń mańyzyn arttyra tústi. Sondyqtan bizdiń basty maqsatymyz – densaýlyq salasyn damytý, – deıdi oblys ákimi M.Dosmuhambetov.
Ákimniń aıtýynsha, densaýlyq saqtaý salasyna qoldaý kórsetý jalǵasa beredi. Kelesi jyly respýblıkalyq bıýdjettiń esebinen qosymsha 60 sanıtarlyq avtokólikti satyp alý josparlanypty.
Al oblystyq densaýlyq saqtaý basqarmasynda qaýipti indettiń yqtımal ekinshi tolqynymen kúreske baılanysty arnaıy shtab quryldy. Osyǵan oraı basqarma basshysynyń orynbasary Ashan Baıdýálıev quramyna óńirdegi emdeý mekemeleriniń basshylary engen shtabtyń alǵashqy otyrysyn ótkizip, naqty jospardy bekitti.
– Kún sýytqan saıyn vırýstyq juqpalar órshıdi. Sondyqtan koronavırýs ınfeksııasy tumaýmen birge kúsheıýi múmkin. Onyń ústine álem elderinde koronavırýsty juqtyrǵandar sany kóbeıip otyr. Qaýipti indet órshı qalǵan tusta jan-jaqty daıyn bolýymyz kerek. Sol sebepten daıyndyqty shırata tústik, – deıdi A.Baıdýálıev.
Atyraý qalasyndaǵy №2 oblystyq ınfeksııalyq aýrýhanasynyń bólim meńgerýshisi Jantóre Orysbaevanyń málimetine súıensek, naýryzdan beri qaýipti indetti juqtyrǵan naýqastardyń 96,4 paıyzy saýyǵyp shyqsa, 3-4 paıyzy kóz jumǵan.
– Qaıǵyly jaǵdaıǵa uryndyrǵan birneshe sebep bar. Birinshiden, naýqastar qaýipti indettiń belgisi baryn dárigerge keshigip habarlaǵan. Ekinshiden, naýqastarda burynnan bar qosymsha sozylmaly aýrýlarynyń asqynýy sebep boldy. Bizdiń aýrýhanadan, sondaı-aq koronavırýs ınfeksııasymen 30 bala, 134 júkti áıel emdelip shyqty. Tórt áıelge shuǵyl operasııa jasaldy. Júkti áıelderdi qosymsha aýrýlaryna baılanysty endokrınolog, gematolog, kardıolog sekildi arnaıy dárigerlerden onlaın keńes alý arqyly emdedik, – deıdi J.Orysbaeva.
Atyraý oblysy
