Atalǵan kompanııa bul medısınalyq dárilerdi Densaýlyq saqtaý mınıstrligine kórsetilgen gýmanıtarlyq kómek aıasynda satyp alyp, jetkizdi.
– «Shevron» kompanııasy únemi áleýmettik jaýapkershilik tanytyp, Qazaqstandaǵy ózekti máselelerge eshqashan beıjaı qaramaıdy. Elimizge kórsetken gýmanıtarlyq kómek úshin, dáriler úshin kompanııaǵa alǵys aıtqym keledi. Qazaqstandaǵy koronavırýs ınfeksııasy men pnevmonııanyń taralýyn osylaısha birigip toqtata alamyz, – dedi Densaýlyq saqtaý mınıstri Alekseı Soı.
«Shevron» kompanııasynyń Eýrazııa bólimshesiniń basqarýshy dırektory Djon Balts Almaty qalasyna dári-dármekterdiń birinshi toptamasy kelgenin qýanyshpen habarlap, kompanııa osyndaı qaıyrymdylyq jobasymen Qazaqstan halqyna kúrdeli kezeńde qoldaý kórsetkisi kelgenin málimdedi. Bul dári-dármektiń bári emhanalar men aýrýhanalardaǵy pasıentterge jetkiziledi.
Memlekettiń pandemııaǵa qarsy kúresine kómektesý úshin «Shevron» Densaýlyq saqtaý mınıstrligimen birlese otyryp, asa qajetti dári-dármek tizimin qurdy. Dári-dármekti jetkizýmen qatar, bul baǵdarlama medısınalyq jabdyqty satyp alýǵa jáne COVID-19 indetine shaldyqqan adamdardy emdeıtin densaýlyq saqtaý salasynyń qyzmetkerlerin oqytýǵa septesedi.
Aıta ketsek, «Shevron» korporasııasy – álemdegi jetekshi biriktirilgen energetıkalyq kompanııalardyń biri. Búkil álemde bıznesin júrgizetin enshiles kompanııalary arqyly kompanııa energetıka salasynyń barlyq túrine qatysady. «Shevron» shıki munaı men tabıǵı gazdy zertteıdi, óndiredi jáne tasymaldaıdy, kólik otyny men janarmaıdy tazartady, naryqqa shyǵarady jáne taratady; munaı-hımııalyq zattar men qospalardy óndiredi; qýat óndiredi jáne kompanııa operasııalarynyń barlyq salasyndaǵy bıznes qundylyqtaryn arttyratyn tehnologııalardy daıyndaıdy jáne qoldanady.
