Ashyq aspan astynda ótip jatqan jıynǵa Túrkistan oblysy aýyl sharýashylyǵy basqarmasynyń basshy orynbasary T.Ospanov, «Túrkistan» ÁKK» AQ ókilderi, aýdan, qala aýyl sharýashylyǵy bólimderiniń basshylary, ǵylymı ınstıtýt basshylary, ǵalymdar, aýyl sharýashylyǵy taýar óndirýshileri qatysýda.
Túrkistan qalasy aýmaǵynda azyq-túlik beldeýin qalyptastyrý aıasynda 1458 sharýa qojalyqty 9 kooperatıvterge biriktirip, 11 myń ga alqapta jańbyrlatyp sýarý tehnologııasyn endirýdi kózdelgen. Búginde 892 ga jerge 21 birlik jańbyrlatyp sýǵarý mashınalary ornatyldy. Jańbyrlatyp sýǵarý tehnologııasynyń tıimdiligi aǵyn sýdy 2 esege únemdep, ónimdilikti 3-4 esege arttyratyndyǵy ǵylymı dáleldengen. Atalǵan tehnologııa Túrkistan qalasynyń aýmaǵyndaǵy 1 200 basqa arnalǵan taýarly-sút fermasy, 10 myń basqa arnalǵan iri qara maldy bordaqylaý keshenin qurý jobasynda, 20 myń tonna qus etin óndiretin jáne 400 ga jerge qara órik otyrǵyzý jobalarynda keńinen júzege asýda.
Túrkistan qalasynyń azyq-túlik beldeýinde turaqty azyq bazasyn qurý úshin birqatar ınnovasııalyq tehnologııalar engizilmek. Semınar-keńeste "Qazaq eginshilik jáne ósimdik sharýashylyǵy ǴZI" ǵalymdary engizgen jem bazasyn qurý úshin jońyshqa jáne basqa jem-shóp daqyldaryn ósirýdiń, bıdaı jáne júgerini (dándik, súrlemdik) ósirýdiń ınnovasııalyq tehnologııasy jobalary agroqurylymdarǵa jan-jaqty tanystyryldy. Tájirıbe almasyp, ǵylymı ınstıtýttar men sharýalar aldaǵy ýaqytta birlese jumys atqarýǵa qyzyǵýshylyq tanytýda.
