Jyl sanap elordadaǵy volonterler sany da kóbeıip keledi. Jaǵdaıy qıyn jandarǵa qolushyn sozyp, kómegin aıamaıtyn jastardyń qatary qalyń ekendigi qýantady. «Astana jastarynyń» ózinde 2,5 myńnan astam erikti bar. Olar volonterliktiń bir rettik shara emes, kúndelikti ómirdiń birine aınalǵanyn aıtady.
«Búkil álemde eriktiler qyzmetine erekshe nazar aýdarylady. Sheteldik JOO-ǵa oqýǵa túsý kezinde volonterlik tájirıbeniń artyqshylyǵy bar. Basqalarǵa kómektesýge daıyn, qamqor azamattarymyzdyń kóp ekenine qýanyshtymyn», deıdi volonter Mıras Muratov. Ol bul qyzmette qarııalardyń batasyn alý eń úlken qurmet ekenin jetkizdi. «О́zim qatysqan alǵashqy úlken sharada bizdi bir kúshtiń biriktirgenin sezdim. Ol birlik edi. Qysta jáne kóktem kelgende jeke turǵyn úılerdiń aýmaǵyn qar men muzdan tazartý úshin qyzdar men uldar bolyp kómekke jıi baratynbyz. Kóbine kómekke jalǵyzbasty qarttar muqtaj. Toptyń eń kishisi bolǵan soń únemi úılerdiń shatyryn qardan tazartýǵa meni jiberetin. Keıbir ájeler bizdi esten shyǵarmaı, qar tazalaǵannan keıin shaıǵa shaqyrady. Men úshin volonterlikten alatyn eń qundy nárse – adamdardyń shynaıy alǵysy», deıdi Mıras.
«Astana jastary» volonterlerdi qataryna qabyldamastan buryn olardy arnaıy mektepte oqytady. Bıyl 300-ge jýyq volonterdi oqytýdy josparlap otyr eken. Uıymda volonter bolǵysy keletinder úsh kezeńnen turatyn oqýdan ótýi kerek. «Aldymen bastapqy daıyndyq kýrsynan ótedi. Onda alǵashqy medısınalyq kómek kórsetýdi úıretedi, túrli psıhologııalyq trenıngter de bar», deıdi Nur-Sultan ákimdiginiń «Astana jastary» basshysy Shyńǵys Tileýlın.
Bastapqy daıyndyq shamamen on sabaqtan turady. Odan keıin mamandandyrý kýrsy ótedi. Volonterler baǵyttarǵa bólinedi. «Tótenshe jaǵdaılardaǵy kómekke qatysqysy keletinder mamandarmen birge daıarlyqtan ótip, oqý-jattyǵý jıyndaryna barady. Sonymen qatar halyqaralyq eriktiler men áleýmettik eriktilerge arnalǵan trenıngter ótkiziledi. Ári qaraı tikeleı aksııalar kezinde praktıkalyq sabaqtar bolady», dedi «Astana jastarynyń» basshysy.
Uıymda 2014 jyldan bastap 2 myńnan astam volonter daıarlyqtan ótipti. Olar Arys qalasyn qalpyna keltirýge kómektesti, pandemııa kezinde muqtajdarǵa kómek kórsetip, maskalar taratty jáne buǵan deıin Qazaqstannyń astanasynda ótken halyqaralyq is-sharalarǵa da belsene qatysqan.
Jaqynda qalalyq volonterler shtaby Almaty aýdany ákimdigimen birlese otyryp, aýdandaǵy 50 qartqa áleýmettik kómek kórsetken. Jalpy, egde jastaǵy turǵyndarǵa kómek berý – elordalyq jastardyń jyldaǵy dástúri. Qyrkúıek-qazan aılarynda da kómekke muqtaj jandardyń aýlasyn, úı-ishin tazalap, 30-ǵa jýyǵyna arnaıy azyq-túlik sebeti jetkiziledi. Al ardagerlerge qandaı kómek qajet ekeni týraly aqparatty aýdandyq Ardagerler keńesi berip otyrady.
«Jyl basynan beri júzden astam qarttyń aýlasyn qoqystan tazartyp, úı-sharýasyna kómektesý, azyq-túlik alyp kelý sekildi jumystardy atqaryp kelemiz. Jeńistiń 75 jyldyǵyna arnap ardagerlerdiń aýlasynda Memlekettik akademııalyq fılarmonııasymen birge shaǵyn konserttik baǵdarlama da usyndyq. Turmysqa qajetti áleýmettik sebetter de taratyldy. Qorǵanys mınıstrligimen birigip, tyl ardagerlerine medaldaryn tabys etýmen de aınalystyq. Sebebi karantın kezinde qarttardyń syrtqa shyǵýy qaýipti edi. Sonymen qatar dári-dármekter men vırýstan qorǵaný quraldaryn jetkizip berdik», deıdi Nur-Sultan qalalyq Jastar saıasaty basqarmasynyń bólim basshysy Aqulan Tastemir.
Búginge deıin az qamtylǵan 150-den astam qartqa azyq-túlik sebeti tabystalǵan. Kómek qajet etetin egde jastaǵy azamattar 109 IKomek ortalyǵyna ótinish berse de bolady.
