О́tken demalys kúnderi polıseıler, SES jáne ákimdik ókilderi bazarlar men basqa da nysandardy aralady. Belgili bolǵandaı, keıbir ShOB ókilderi karantın rejımi kúsheıgenine qaramastan buzýshylyq jasaýdy jalǵastyrýda. Mysaly, bazarlardyń biriniń ıeleri demalys kúnderi jumys ýaqytyn saqtamaǵany úshin úlken aıyppul tóleıdi. Taǵy bir orynda tekserýshiler kire beriste sanıtaızerler ornatylmaǵanyn anyqtady. Sonymen qatar, jaýapty adamdar janasýsyz termometrdi qoldana almady.
"Saýda úıleri demalys kúnderi jumys istemeýi kerek, tek dárihanalar, qoǵamdyq tamaqtaný oryndary bolsa, olar jumys isteýge quqyly", dep túsindirdi Baıqońyr aýdany boıynsha taýarlar men qyzmetterdiń sapasy men qaýipsizdigin baqylaý basqarmasy basshysynyń orynbasary Saltanat Yqylasova.
Mamandardyń aıtýynsha, qazirgi kezdegi negizgi buzýshylyqtar – jumys rejımin saqtamaý, qoǵamdyq tamaqtaný oryndarynda kelýshiler sanynyń kóp bolýy, satyp alýshylar men satýshylar úshin maskanyń bolmaýy, áleýmettik qashyqtyq saqtamaý, nysannyń kireberisinde antıseptıkterdiń bolmaýy, keı jerlerde kelýshiler men qyzmetkerlerdiń termometrııasy júrgizilmeıdi. Sondaı-aq jıi kezdesetin buzýshylyqtar qataryna buqaralyq otbasylyq is-sharalardy, kezdesýlerdi, jıyndardy ótkizý jatady.
"9 qazandaǵy jaǵdaı boıynsha barlyǵy 1240 raport kelip tústi. Onyń 627-si qaralyp, 133 766 808 teńge kóleminde ákimshilik aıyppul salyndy. Onyń ishinde 509-y boıynsha 110 196 325 teńge óndirildi. Tórt materıal sottyń qaraýyna jiberildi", delingen habarlamada.
Esterińizge sala keteıik, elordada karantın rejımi kúsheıtilgeni jarııalanǵan bolatyn. Azamattar maska taǵý tártibin, araqashyqtyqty qatań saqtap, antıseptık qoldanýy kerek.
Quqyq buzýshylyq anyqtalǵan jaǵdaıda, jeke tulǵalarǵa 30 AEK (83 340 teńge), zańdy tulǵalarǵa – 230-dan 1600 AEK-ke deıin (4 mıllıon 445 myń teńgege deıin) aıyppul salynady. Kinásin moıyndaǵan jaǵdaıda, aıyppul jeti kún ishinde 50% jeńildikpen tólenedi. Jeti kún ishinde tólenbegen nemese kinásin moıyndamaǵan jaǵdaıda, ákimshilik aıyppul týraly qaýly tolyǵymen shyǵarylyp, 30 kún ishinde tólenedi.
