Atalǵan is-sharaǵa elimizdegi jáne shetelderdegi týberkýlezge qarsy uıymdardyń, memlekettik organdardyń basshylary, medısına salasynyń ǵalymdary qatysty. Aldymen jaman tumaý jaılaǵan kezeńniń jaı-japsary qamtylǵan jınaqtyń tusaýkeseri ótti. Budan ári oblystyq ftızıopýlmonologııa ortalyǵy men kópsalaly oblystyq aýrýhanada týberkýlezge, onkologııalyq patologııaǵa jáne basqa da syrqattarǵa qajetti hırýrgııalyq kómek kórsetý boıynsha respýblıkanyń tanymal hırýrgteriniń qatysýymen sheberlik sabaǵy uıymdastyryldy.
COVID-19 pandemııasynyń alǵashqy tolqynynan qorytyndy shyǵaryp, ótkenge kóz júgirtetin, medısınalyq kómekti jaqsartýdyń qosymsha sharalaryn anyqtaıtyn ýaqyt keldi. Pandemııa kúsheıgen kezeńde týberkýlezge qarsy kómek, sonymen qatar epıdemııalyq jaǵdaıdyń kez kelgen qıyndyqtary týyndaýy ábden múmkin.
Konferensııa barysynda Ulttyq ftızıopýlmonologııa ǵylymı ortalyǵynyń dırektory, medısına ǵylymdarynyń doktory Málik Ádenov elimizdegi jaǵdaı týraly egjeı-tegjeıli aıtyp berdi. Aqmola oblysy boıynsha taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Aınagúl Mýsına qazirgi qaýip-qaterler kezindegi sanıtarlyq-epıdemııalyq qyzmet jumysynyń máselelerine toqtaldy. Sondaı-aq koronavırýs juqpasymen kúreste densaýlyq saqtaý uıymdarynyń qyzmetkerlerin qarjylyq qoldaý sharalary men indet kezinde qylmystyq-atqarý júıesi departamentiniń mekemelerinde epıdemııaǵa qarsy is-sharalardy uıymdastyrý jumystary da umyt qalǵan joq.
Sonymen qatar ǵylymı-praktıkalyq konferensııanyń plenarlyq bólimi ótti. Onda Belarýs, Ýkraına, Moldova, О́zbekstan, Qyrǵyzstan, Túrkııa elderinen jáne Reseıdiń Sankt-Peterbýrg, Arhangelsk, Omsk qalalarynan kelgen medısına ǵylymdarynyń doktorlary, belgili hırýrg dárigerler baıandama jasady. Plenarlyq bólimde jaman tumaýǵa baılanysty alǵashqy kezeńde oryn alǵan kemshilikterdi joıý máseleleri muqııat sarapqa salyndy. О́tkennen sabaq alyp, aldaǵy ýaqytta qolbaılaý bolǵan keıbir máselelerdi sheshý jaıy qarastyryldy.
Kókshetaý
