Mekeme taratqan habarlamada bylaı dep jazylǵan: «Osy jyldyń 6 qazanynda Qaraǵandy qalasyndaǵy QAJ-da kishkentaı qyz balany zorlady degen kúdikpen qamaýda otyrǵan er adamnyń múrdesi tabyldy. Shaqyrylǵan jedel medısınalyq kómek brıgadasy ólimdi rastady. О́limniń aldyn ala sebebi – sýısıd. Tekserý barysynda qaıtys bolǵannyń denesinde qandaı da bir zaqymnyń belgileri anyqtalǵan joq...».
Eske salar bolsaq, bıylǵy 23 shildede Sátbaev qalasynda eldi eleń etkizgen qylmystyq oqıǵa bolǵan edi. Kenshilerdiń shaǵyn qalasyndaǵy kópqabatty úılerdiń birindegi aýlada júrgen bes jasar qyz bala keshke qaraı ushty-kúıli joǵalyp ketken bolatyn. Bul sýyt habardan qulaqtanǵan qala jurty tártip saqshylarymen birge qalany tintip, izdeýge atsalysqan edi. Joǵalǵan bala eki-úsh saǵattan keıin álgi úıdegi páterlerdiń birinen tabyldy. Sóıtse, kishkentaı qyzdy azǵyn erkek aýzyn skotchtap, úıde tyǵyp ustap otyrǵan eken...
Osy habardy estı salysymen ashý-yzaǵa boı aldyrǵan bir top turǵyn kúdiktini qoldaryna berýdi talap etip, polısııa qyzmetkerlerimen qaqtyǵysýǵa deıin barǵan. Bul týrasynda «Egemen Qazaqstan» gazetinde tolyǵyraq jazyldy da («Sátbaevtaǵy soraqylyq», №141, 27.07.20 j.).
Sonymen, bes jastaǵy beıkúná sábıdiń obalyna qalǵan, qala halqyn dúrbeleńge salǵan azǵyndy ajal oǵy osylaısha abaqtyda qamaýda otyrǵan jerinde tapty...
Al ekinshi jańalyqqa kelsek, áleýmettik jelilerde ázilkesh Tursynbek Qabatovtyń atyndaǵy temir tulpardyń Qaraǵandy oblysynyń aýmaǵynda, naqtyraq aıtsaq Nura aýdanyndaǵy Ahmet aýylynyń mańynda adam qaǵyp óltirgeni týraly aqparat jeldeı esti. Jańalyq endi jarq etkenimen, bul oqıǵa ózi budan bir jyl buryn, ıaǵnı 2019 jyldyń 13 qazanynda bolǵan eken. Sol kúni keshke Temirtaý – Nura – Nur-Sultan trassasynda jol talǵamaıtyn «Leksýs» markaly kóligi joǵary jyldamdyqpen kelip adam qaqqan. Japa shegýshi 34 jastaǵy Erlan Omarqulov oqıǵa bolǵan jerde tilge kelmeı ketipti. Keıin belgili bolǵandaı, atalǵan kólik Tursynbek Qabatovtiki bolyp shyǵady. Al ony júrgizgen 25 jastaǵy ázirge esimi belgisiz jas jigit eken.
Búginde jalǵyz ulynan aıyrylǵan Dádjan Omarqulovanyń quqyq qorǵaýshylarǵa degen ókpesi qara qazandaı. Ol kisiniń aıtýynsha, tergeýshiler bolǵan oqıǵany ádil, derekterdi ádeıilep burmalaǵan. Máselen, D.Omarqulova prokýrorǵa jazǵan shaǵymynda tergeýshiniń isti japa shegýshi taraptyń qatysýynsyz júrgizgenin, sondaı-aq onyń prokýrordyń kelisiminsiz aıǵaq zattardy joıyp jibergenin málim etedi.
Al qylmystyq istiń ózine keler bolsaq, tergeýshiniń uıǵarymymen qylmys quramy joq degen ýájben toqtatylǵan eken. Iаǵnı bar kiná japa shegýshi marqumǵa aýdarylyp, apat jasaǵan kúdikti júrgizýshi jazadan qutylyp ketken. Tergeý materıaldaryna sensek, qaza bolǵan azamattyń qanynan alkogoldi ishimdiktiń belgileri anyqtaldy degen derek bar. Al djıpti tizgindegen 25 jastaǵy jigit oqıǵa bolardan buryn júrgizýshi kýáliginen aıyrylǵan eken.
Qazirgi tańda bul oqıǵaǵa qatysty qylmystyq isti prokýratýra qaıtaryp alyp, oblystyq polısııa departamentiniń basqa tergeýshisine jiberdi. Endi marqumnyń anasynyń ǵana emes, jańa tergeýshiniń de belgili ártiske qatysty birqatar suraq týyndaýy múmkin. Máselen, japa shegýshiniń anasy Tursynbek Qabatovtyń óziniń zańdy avtokóligin júrgizýshi kýáliginen aıyrylǵan adamǵa bergeni úshin osy ýaqytqa deıin ne sebepten jaýapkershilikke tartylmaı kelgenine narazy.
Aıtpaqshy, osy áńgime áleýmettik jelide kóterile bastaǵanda ázilkesh Qabatov efırge shyǵyp, bolǵan oqıǵaǵa óz múddesi turǵysynan túsinik berdi. «Men ol jigitke «qolyńmen istegenińdi moınyńmen kóter, men aralaspaımyn» dep aıttym. Bireýler «Tursynbek aqsha berdi» dedi. Men eshkimge xabarlasqan emespin. Bul iske aralasqan joqpyn. Maǵan qoıǵan suraqtarǵa jaýap berdim. Men onyń kýáligi joǵyn bilmeımin. Sondyqtan aıtarym: qazir ártúrli aqparat tarap jatyr, ıá, men onyń basynda bolmasam da, kólik seniki ǵoı dep kiná taǵyp jatqandar bolsa, men keshirim suraımyn. Biraq men ol kóliktiń ishinde bolǵan emespin. Sizderge aıtarym osy», dep aqtaldy ártis.
Qalaı bolǵan kúnde de, jurttyń nazaryn aýdarǵan bul oqıǵalardyń nemen aıaqtalǵanyn aldaǵy ýaqytta nazarda ustaıtyn bolamyz.
Qaraǵandy oblysy
