Bul rejısserdiń fransýz kórermenderi úshin úlken ekrandarda kórsetilip jatqan ekinshi týyndysy. Buǵan deıin 2018 jyly «Álemniń erke enjarlyǵy» fılmi prokatqa shyǵyp, kelesi jylynda osy elde dvd-de jaryq kórgen bolatyn. Eki fılmniń de kórermenge jol tartýymen fransııalyq Arizona Distribution kompanııasy aınalysty. Fransýz kórermenderi Ádilhan Erjanovtyń fılmderin erekshe jaqsy kóredi desek artyq aıtqanymyz emes. Kóptegen halyqaralyq júldelerdi ıelenip júrgen rejısserdiń kartınalaryn fransýz kınosynshylary oń baǵalady. Biz muny fılmniń prokatqa shyǵý qarsańynda Fransııanyń jetekshi basylymdarynda jaryq kórgen birqatar resenzııadan baıqadyq. Máselen, Le Monde basylymy «Qap-qara adam» – mınımalıstik estetıkasy bar dala vesterni men nýardyń qospasy» dep jazsa, Voir A Lire kınojýrnaly «Ádilhan Erjanovtyń kınematografııalyq minsizdigine bir qadam qaldy» dep joǵary baǵa beredi.
«Bul – óte joǵary kınematografııalyq tájirıbe. Rejısserdiń epızodty túsirýdegi uqyptylyǵy erekshe. Rejısser kórermenge kedeılik aıasynda aqyl men demokratııanyń ornyn sybaılas jemqorlyq basqan qoǵamdaǵy adamı kúrdeli qatynastar týraly ózindik paıym qalyptastyrýǵa múmkindik beredi. Fılmde qatań úkimder joq. Kerisinshe, ssenarııdegi kúlkide keıipkerlerge aýyr áleýmettik qysymdy jeńýge jáne shyndyq boryshyn óteýge kómektesetin sıpattama bar», dep jazdy Voir A Lire basylymy.
Atalǵan kartınany túsirýge Short Brothers (Qazaqstan) jáne Arizona Productions (Fransııa) kompanııalarynyń qatysýymen Astana Film Fund (Qazaqstan) kompanııasy atsalysty. Dramalyq trıllerde tergeýshi Bekzattyń (akter Danııar Alshynov) basynan ótken oqıǵasy baıandalady. Fılm jelisi boıynsha tergeýshi isti tez arada japqysy keledi, óıtkeni jergilikti polısııa qyzmetkerleri jazyqsyz Pýkýardy (Teoman Hose) kináli dep kesip qoıǵan. Biraq qaladan kelgen jýrnalıst Arıana (Dınara Baqtybaeva) iske aralasyp, bulardyń josparyn ózgertedi. Endi tergeýshi alǵash ret zań aıasynda naqty tergeý júrgizýge májbúr bolady.
«Qazaqstandyq kınonyń Eýropada prokatqa shyǵýy árıne qýanarlyq jaǵdaı. Meniń oıymsha, bul búkil komandanyń jáne fılmge qatysqan barlyq azamattardyń jetistigi. Barshalaryńyzdy shyn júrekten quttyqtaımyn!», dedi Ádilhan Erjanov.
«Qap-qara adam» fılminiń álemdik premerasy 2019 jyldyń 23 qyrkúıeginde Ispanııada ótti. Kartına San Sebastıandaǵy 67-shi halyqaralyq kınofestıvaldiń negizgi konkýrstyq baǵdarlamasy aıasynda kórsetildi. San Sebastian International Film Festival – «A» klasyndaǵy álemdegi eń kóne kınofestıvalderdiń biri (Kann, Berlın jáne Venesııamen birge). 2019 jyldyń qarasha aıynda Ádilhan Erjanov «Qap-qara adam» fılmindegi jumysy úshin «Úzdik rejısser» nomınasııasy boıynsha Asia Pacific Screen Awards – 2019 júldesine ıe boldy. Ádilhan – azııalyq «Oskar» syılyǵyna ıe bolǵan alǵashqy qazaqstandyq rejısser.
