"Júsip Balasaǵun aıtqandaı, "Ádil sóz ashy kórinedi". Keıbir sot advokattardy aqıqatty aıtqany úshin qysymǵa alatynyna kýá boldym. "Barlyq azamattardyń qyzmettik jaıy men áleýmettik mártebesine qaramastan zań aldynda teń bolýy kerek" degen sóz árbir qazaqstandyqtyń sanasynda saırap turýy tıis. Sonda ǵana zańnyń ústemdigi óz bıiginde qalady. Sottarda prokýrordyń, anda-sanda keletin medıatorlardyń bólmesi bar. Al sot ishinen shyqpaıtyn advokattardyń bólmesi de joq", dedi ol.
Sondaı-aq ol aýylda advokattardyń jetispeıtinin, kópshiliginde materıaldyq jaǵdaıy tómen ekenin basa aıtty.
"Advokattardyń áleýmettik qaýipsizdigi. Mundaǵy aıtpaǵym, ádildik jolynda basyn báıgege tigýge ázir jandar úshin qarapaıym eńbekke jaramsyzdyq paraǵyna qarajat qarastyrylmaıdy. Tabys pen zeınetaqy jarnalaryna 10 paıyz mólsherinde qosarlanǵan salyq salynady. Qyzyǵy sol, quqyq qorǵaý, sot organdary úshin tegin júzege asyrylatyn zań kómegi aqparattyq júıesine advokattar aıyna 6 myń teńgeniń ústinde qarajat jumsaýy kerek. Nege olaı?", dedi Aıman Omarova.
Belgili advokat halyqtyń quqyqtyq saýattylyǵyn arttyrý baǵytynda atqarylyp jatqan jumystarǵa da toqtalyp ótti.
"Zań adam paıdasyna jazylady. Adam zań úshin týmaıdy". Qoǵam qaıratkeri Álıhan Bókeıhannyń osynaý óreli oıy jyldar jyljyǵan saıyn qundylyǵyn arttyryp keledi. Rasynda, ádil zań qoǵam damýynyń irgetasy. Mundaǵy basty másele qarasha halyqtyń quqyqtyq saýattylyǵyn arttyrý bolyp tur. Osy maqsatta Sybaılas jemqorlyqqa qarsy is-qımyl agenttiginiń tóraǵasy Alık Shpekbaevpen birlesip, "Adal kómek" jobasyna jetekshilik etýdemin. Osy jyldyń aqpan aıynda bastalǵan joba az ýaqytta kópshiliktiń yqylasyna bólendi. Bul turǵyda azamattyq qoǵam memlekettik organdarǵa kómek berýge ázir. Oǵan "Adal kómek" tuǵyrnamasyn qurý arqyly kózimiz jetip otyr. Sońǵy málimet boıynsha 2 mln 200 myńnan astam azamat tikeleı efırdi kórip, onyń 26 myńnan astamy joba aıasynda quqyqtyq kómekti tegin aldy", dedi ol.
Aıman Omarovanyń aıtýynsha, "Adal kómek" arqyly el ishin kezip júrip, túrli túıtkildi máselelermen betpe-bet kelgen.
"Elimizdegi áskerı zeınetkerler ótemaqysyn ala almaı júr. Sol sekildi múmkindigi shekteýli tulǵalardyń da taǵdyry alańdatarlyq. Áleýmettiń áleýetin kózben kórý nátıjesinde "Halyq úni" jańa jobasynyń ıdeıasy týyndady. Qazirgi ýaqytta jańa jobany Aqparat jáne qoǵamdyq damý mınıstri Aıda Balaevamen, "Altyn qyran" qorynyń tóraǵasy Islambek Saljanovpen seriktesip júzege asyrmaqpyz", dedi Aıman Omarova.
