Qazir janarmaı beketterindegi uzyn-sonar kezekten kóz súrinedi. Kúni buryn tallon alǵandarǵa ǵana kógildir otyn bosatylýda. Qalǵandary áıteýir bir kelip qalar degen dámemen tosýda.
– Keshe túnde baǵa birden ósti. Áýeli lıtri 57 teńge bolǵan, qazir 80 teńgeden satylýda, – deıdi qala turǵyny Baǵlan Ámirjanov, – sonyń ózinde taptyrmaıdy. Áıtse de, janarmaıdan arzan ǵoı dep amalsyzdan alasyń. Dál osyndaı qysyltaıań kezde paıda tabýdy kózdeıtin kásipkerlerdiń pıǵyly alańdatady.
Keıbir janarmaı beketterinde gaz múldem joq. Ondaǵy qyzmetkerler gaz izdep kelgen qala turǵyndaryn keri qaıtaryp jatyr. Biz sóılesken qala turǵyny Qonys Eseevtiń aıtýyna qaraǵanda, ýaqtyly as-sý daıyndaýdyń ózi muń bolyp qalǵan. Avtokóligi gazben júretinderdiń ókpesi qara qazandaı. Osyndaıda joramal aıtatyn «kóripkelderdiń» pikirine qaraǵanda, gaz baǵasyn ósirý úshin jasalyp jatqan amal-mys. Gaz quıý beketindegiler de kógildir otynnyń aıaqastynan joq bolyp ketýiniń naqty sebebin túsindire almaıdy.
– Jeńil avtokólikterge aldyn ala talon alyp qoıǵandarǵa gaz quıýǵa mindettimiz, – deıdi gaz quıý beketiniń ókili Talǵat Álibaev, – olar aldyn ala aqshasyn tólep qoıdy ǵoı, quımaýǵa haqymyz joq. Qazir oblysqa keletin kógildir otynnyń deni elevatorlar men qoımalarǵa astyq keptirý úshin jóneltilip jatyr. Ol da óte mańyzdy sharýa ǵoı.
Eger másele ýaqtyly sheshimin tappasa, jaǵdaıdyń ýshyǵyp ketýi de múmkin. Jaýapty mekeme basshylary bir-birimen ýádelesip qoıǵandaı bir ǵana jaýap aıtýda.
– Jaǵdaıdyń osylaı qalyptasýyna zaýyttardaǵy jóndeý jumystarynyń sozylyp ketýi sebep bolyp otyr. Qyrkúıek aıynda bastalǵan jumys áli de jalǵasýda. Qashan aıaqtalatyny belgisiz, – deıdi oblystyq energetıka jáne turǵyn úı-kommýnaldyq sharýashylyǵy basqarmasynyń bólim meńgerýshisi Jasqaırat Sadyqov.
Kópshilikti áýre-sarsańǵa salǵan kógildir otyn tapshylyǵy qashan joıylatyndyǵyn eshkim tap basyp aıta almaıdy. Onsyz kósegemizdiń kógermeıtini belgili bolyp otyr.
KО́KShETAÝ
