Oblys ortalyǵyndaǵy qurylys qarqyny ótken jyldarmen salystyrǵanda áldeqaıda jaqsy. Jańa turǵyn úıler jaýynnan keıingi sańyraýqulaqtaı birinen soń biri qaptap boı kóterýde. Áıtse de, jetim balalardyń nesibesi kóbeımeı-aq tur. Qazirgi kúni oblysta ata-analarynyń qamqorlyǵynsyz qalǵan 2 myńnan astam bala bar. Olar da kámelettik jasqa tolǵan kezde baspana kezegine turady. Búgingi tizimniń ústemelenip, ulǵaıa túsetindigi sózsiz. Amal joq, jetim balalar qalalyq ákimdiktiń tabaldyryǵyn tozdyryp, ýaqytsha bolsa da baspanaǵa qol jetkizgisi keledi.
Jaýtańdaǵan balalar ózimdiki degen baspanadan dámeli. Solardyń biri – Dınara Tasbolatova. Qazir ózi de eki balanyń anasy. Páter jaldap turady. Dınaraǵa qalalyq ákimdik ýaqytsha panalaı turýǵa jataqhanadan bir bólme usynǵan eken. Biraq ábden tozyǵy jetken jataqhanada turý tipti de múmkin emes. Bólmeniń tarlyǵy bylaı tursyn, qabyrǵalarynyń bári dymqyl. Sol sebepti azyn-aýlaq kıim-keshegi de, tósek-orny da az ýaqyttyń ishinde kók ıisi shyǵyp, shirip, jaramsyz bolyp qalady.
– Ákimdik usynǵan aınalymǵa kelmeıtin tar bólmede eki balamen turý múlde múmkin emes, – deıdi Dınara Tasbolatova, – birer jyl bolsa bir sári, osy bólmede on jyl turyp qalýym da ǵajap emes qoı. О́ıtkeni, kezektiń jyljýy solaı bolyp tur.
Dınara tárizdi baspana taqsyretin tartyp júrgen balalar úıiniń túlekteri az emes. Bir ǵana oblys ortalyǵynda myńǵa jýyq eken. Kezekte erte turǵandardyń ózi alty-jeti jyl tosyp júr. Áıteýir bir úmit alǵa jetelep, kúderlerin úzbeı keledi. Páter jaldap turǵanda da kósegeleri kógere qoımaıtyndyǵy álmısaqtan belgili. О́ıtkeni, oblys ortalyǵynda sońǵy ýaqytta páter jaldap turý baǵasy tym ósip ketti.
– Aıyna 75 myń teńgege páter jaldap otyrmyn. Turǵyn úı jınaq banki nemese basqa da baǵdarlamalar arqyly úı alý úshin bastapqy jarna qajet, – deıdi balalar úıiniń túlegi Tatıana Danılova, – óziń jartymsyz jalaqy taýyp, turǵyn úı jaldap júrseń, qor qaıdan jınalmaq?! Árıne, tegin alǵymyz kelip otyrǵan joq, aqshasyn tóleýimiz kerek. Osy arada biz úshin bálkim tıimdi joldar qarastyrylsa dep oılaımyz. О́zim úı kezeginde osydan alty jyl buryn 778-shi bolyp tur edim, qazir 539-shy boldym. Sonda men kezegim jetip, úı alǵansha qansha jyl ótýi múmkin?..
Qazir oblysta 21 myńnan astam adam baspana kezeginde tur. Olardyń 4,5 myńǵa jýyǵy jetimder men ata-anasynyń qamqorlyǵynan aıyrylǵandar. Ár jyl saıyn ortasha eseppen balalar úıleriniń túlekteriniń 90-y ǵana baspanaly bolýda.
– Sońǵy tórt jyl men bıylǵy 9 aıdy qosa eseptegende, oblys boıynsha jetimder men ata-analarynyń qamqorlyǵynan aıyrylǵandar sanaty boıynsha 288 adamǵa páter berildi. Baspana bólýdi jergilikti jerdegi ákimdikter júzege asyrady, – deıdi oblystyq energetıka jáne turǵyn úı-kommýnaldyq sharýashylyǵy basqarmasy bóliminiń bas mamany Elena Erına, – qoldanystaǵy zańǵa sáıkes paıdalanýǵa berilgen jaldamaly páterlerdiń 20 paıyzy osy sanatqa bólinýi qajet. Bul talap buzylyp turǵan joq.
Talaptyń buzylmaǵany árıne durys. Degenmen osy qarqynda baspana beriletin bolsa, úmit úzilmese de, ábden jińishkeretin shyǵar. Máselen, bıylǵy 9 aıda oblysta 300 arendalyq páter paıdalanýǵa berildi, onyń ishinde jetimderge buıyrǵany 27 ǵana baspana. Osy bir máseleni túbegeıli zerttep, jańa bir jolyn tappasaq, onsyz da ómirge ókpeli balalardyń kóz jasy qurǵamaıtyn shyǵar. Jetimin jylatpaǵan el edik qoı, bir jóni bolar ma eken?!
Aqmola oblysy
