Aýyl alǵashqy qazyǵyn qaqqannan beri qudyq sýyn iship keledi. Bul óńirde jerasty sýy tapshy. Qansha qazsańyz da tuzdy sý shyǵady. Meıiriń qanyp ishe almaısyń. Buǵan deıin qazylǵan qos qudyqtyń dámi osyndaı. Onyń ústine sapasy da kúmándi. Áıtse de aýyl turǵyndary kóndigip kelgen. Endi mine, úmit oty janǵaly tur. Eldi mekende aýyz sýdy tasymaldaıtyn jáne tazartatyn biriktirilgen blok-modýl iske qosylmaq. Burynǵy qudyqtarǵa qaraǵanda, áldeqaıda qýatty. Sondyqtan sátin salsa taza sýǵa qaryq qylmaq. Burynǵy qudyqtar qaýǵany birer ret salǵan soń taıyzdalyp, sýy sarqylyp, túbi kórinip qalatyn. Mamandardyń aıtýyna qaraǵanda, jańa modýl aýyz sýdy molynan beretin kórinedi. Eń bastysy, osy tájirıbe oń nátıje berse, tóńirektegi sý tapshylyǵyn tartyp otyrǵan eldi mekenderge de ornatylmaq.
Aýyl turǵyndarynyń aıtýyna qaraǵanda, taza sýmen qamtýdyń eki joly bolǵan kórinedi. Birinshisi, taǵy da tereńirek qudyq qazý, ekinshisi, sý tazalaıtyn súzgi qoıý. Aýyldyq keńes otyrysynda el aqsaqaldary egjeı-tegjeıli aqyldasa kele, súzgi qoıatyn bolyp sheshipti. О́ıtkeni dál osy óńirde tap basyp taza sý kózin tapqan eshkim joq. Beınettenip qudyq qazyp, onyń sýy taǵy da ashy bolyp shyqsa, qanshama qarajat jelge ushady. Odan da bar sýdy súzgiden ótkizip, tazalaǵan durys.
Nysandy elordalyq merdiger kompanııa qolǵa alǵan. Qurylysyna aýdandyq bıýdjetten 12 mln teńge qarajat bólingen. Qazir artezıan qudyqtar daıyn. Novokıenka aýylyndaǵy ortalyqtandyrylǵan sýmen jabdyqtaý tehnıkalaryn ornatý jumysy aıaqtalýǵa taıaý. Sátin salsa bul bastama tóńirektegi qanshama halyqtyń qajetin óteýge septigin tıgizetin túri bar.
Aqmola oblysy,
Jaqsy aýdany
