Kórmege 1997-2020 jyldar aralyǵynda týǵan sýretshiniń otyzǵa jýyq jumysy qoıyldy. Shyǵarmashylyǵynyń alǵashqy kezeńin HH ǵasyrdyń 90-jyldary sońyndaǵy týyndylary beıneleıdi. Sońǵy onjyldyqtaǵy jumystar avtordyń shyǵarmashylyq damýyn, órleýin áıgileıdi.
Qazaqbaı Ájibekuly qylqalam sheberleriniń shyǵarmashylyq izdenisteriniń basty jelisin – qazaq halqynyń dástúrli bastaýlary men rýhanı murasynyń jandanýyn beıneleıdi. Táýelsizdik dáýiri boıaýy Qazaqbaı qylqalamynyń ushqyrlyǵynda aıqyn seziledi, erte kezeńdegi jumys tásilinen aıtarlyqtaı erekshelenedi. Saltanatty jıyndy ashqan Elbasy kitaphanasynyń dırektory Ámirhan Rahymjanov sýretshini qazirgi Qazaqstannyń beıneleý óneriniń kósh basynda kele jatqan sýretshilerdiń biregeıi dep atap ótti.
«Saryarqanyń tósinen oryn tepken elordamyzdyń alǵashqy beınesin Elbasymen baılanystyra bilgen Qazaqbaıdyń shyǵarmashylyǵy qashanda alystan erekshe sóılep turady. Avtor ózindik qoltańbasy bar ónerli jan, ol óz jumystarynda halyqtyń mádenıetin, elimizdiń mádenı qundylyqtaryn onyń ulttyq ıdeıasyn ýaqyt pen qazirgi ómirdiń ózara astasyp jatqanyn shynaıy sýretteıdi. Kórmege qylqalam sheberiniń Tuńǵysh Prezıdent – Elbasy kitaphanasynyń qorynda saqtalǵan burynǵy jumystary men álemdik qaýymdastyqty tolǵandyrǵan kózqarastar turǵysynan alǵanda adamzatty oılandyratyn jańa dúnıeleri, týǵan halqynyń ulttyq beınesin somdaǵan tyń týyndylary da qoıyldy», dedi Ámirhan Rahymjanov.
Al belgili sýretshi Kamıl Mýllashev avtordyń astananyń alǵashqy qalyptasý jyldaryndaǵy eńbegine aıryqsha toqtalyp, eshkimge uqsamaıtyn daralyǵyn sýretshiniń ishki baı dúnıesimen baılanystyrdy.
«Qylqalam sheberi retinde ol Qazaqstannan tys jerlerde burynnan tanymal. Basqa elderdegi keskindemeniń jankúıerleri qazaq halqynyń mádenıeti men tarıhyn Qazaqbaı Ájibekulynyń sýretterinen biletini óte mańyzdy. Avtor jumystarynyń bir ereksheligi – halyqqa jaqyn, onyń týyndylarynda bir jylylyq bar, boıaýlary qanyq. Onyń shyǵarmalary sulýlyqqa qushtar ár adamnyń júreginen oryn alady», dep atap ótti ol.
Búgingi tańda Qazaqbaı Ájibekuly – qalyptasqan avtor, Qazaqstan Sýretshiler odaǵynyń múshesi, kóptegen syılyqtyń, sonyń ishinde arnaıy syılyqtyń laýreaty. Á.Qasteevtiń (1999 j.), «Daryn» memlekettik jastar syılyǵynyń (2001 j.) ıegeri. Sýretshiniń ózindik stılin qalyptastyrýda S.Mámbeev, Q.Teljanov, Sh.Sarıev, S.Aıtbaev, T.Toǵyzbaev jáne basqa da kórnekti qazaqstandyq sheberlerdiń shyǵarmashylyǵymen tanysý úlken ról atqardy.
Sýretshiniń jumystary «Aqorda» rezıdensııasynda, Elbasy kitaphanasynyń mýzeıinde, Á.Qasteev atyndaǵy memlekettik beıneleý óneri mýzeıiniń kolleksııalarynda, G.Aıtıev atyndaǵy Qyrǵyz ulttyq beıneleý óneri mýzeıinde jáne álem elderiniń jeke kolleksııalarynda saqtaýly. Qazaqbaı Ájibekulynyń shyǵarmashylyǵy týraly «Dala pastorali», «Keskindemeshi» atty televızııalyq fılmder túsirildi. Qazirgi ýaqytta sýretshi professor, Astana halyqaralyq ýnıversıtetiniń joǵary óner mektebiniń oqytýshysy, sonymen qatar «Astana Opera» KeAQ Dırektorlar keńesiniń táýelsiz dırektory bolyp qyzmet atqarady.
