ÁMEN anımasııalyq festıvali ótedi

Kınofestıvaldiń uıymdas­ty­rý­shylary – OzgeEpic zamanaýı óner keńistigi men Qazaqstan anı­masııalyq kınostýdııalary assosıasııasy. Bir ereksheligi, bıylǵy festıval halyqaralyq deńgeıde atap ótilmek. Atap aıt­qanda, Túrkııa, Ázerbaıjan, Túrikmenstan, О́zbekstan, Qyr­ǵyz­­stan, Tatarstan jáne Bash­qurt­stan anımatorlary atsa­lys­­paq.

Sharanyń maqsaty – qazaq anımasııasynyń damýyna yqpal etý jáne jas daryndarǵa qoldaý kórsetý. Bastama osy saladaǵy aǵa býyn ókilderi tarapynan da qoldaý tapqan. «Bul festıval elimizdiń anımasııalyq áleýetin arttyrýǵa óz úlesin qosatyn mándi qozǵalystyń biri bolady. Biz aǵa býynnyń eńbegine qurmetpen qaraıtyn, jańa býynnyń izde­nisine qoldaý bildiretin qaýym­dastyq qurýdy maqsat etemiz», deıdi kınofestıvaldiń uıym­dastyrýshysy Maqpal Jumabaı.

ÁMEN-2020 sheńberinde Ulttyq kınony qoldaý memle­kettik ortalyǵymen birlesip uıym­dastyrylatyn jetekshi otandyq jáne sheteldik mýltı­plıkatorlardyń sheberlik sy­­nyptary men trenıngteri óte­di. «Rýhanı jańǵyrý» qa­zaq­standyq qoǵamdyq damý ıns­tı­týtynyń qatysýymen «Qa­zaq anımasııasynyń ózekti má­seleleri» jáne «Túrki elde­ri­niń ortaq qaıratkerleri týraly halyqaralyq anımasııalyq joba» taqyryptarynda dóńgelek ústelder uıymdastyrylmaqshy. Oǵan qosa, «Qazaqfılm» kınostýdııasymen birge qazaqstandyq anımasııanyń retrospektıvasy josparlanǵan, oǵan otandyq anımasııa tarıhyndaǵy eń úzdik 16 kartına kiredi (1960-2020), sonyń ishinde otandyq anı­ma­sııanyń negizin qalaýshy Ámen Qaıdarovtyń jumystary da bar. Qazaq anımasııa mektebin qurýda negizgi ról atqarǵan jáne alǵashqy qazaqstandyq anımasııa stýdııasyn ashqan metr Ámen Qaıdarov – «Qarlyǵashtyń quryǵy nege aıyr?» atty al­ǵashqy mýltfılmniń avtory. Shara barysynda Qazaqstan jáne Túrkııa memleketteriniń tolyqmetrli fılmderi de kórse­tiledi. Aıryqsha atap óterligi, rejısser Qasıet Saqıollanyń «Mahambet» mýltfılmi tuń­ǵysh ret halyqaralyq deńgeıde kópshilik nazaryna usynylmaq.

2019-2020 jyldar aralyǵynda túsirilgen anımasııalyq fılm­derge arnalǵan jalpy konkýrs; 2019-2020 jyldary aralyǵynda túsirilgen stýdentterdiń dıplom­dyq, kýrstyq anımasııalyq jumystary qabyldanatyn stý­­dent­tik jumystardyń baı­qaýy syndy festıval birneshe kezeń­nen turady. Al «Tabıǵat jáne adam» taqyrybyndaǵy ko­mıkster konkýrsyna bar­lyq ótinim berýshiler men anımatorlar qatysa alady.

Synshylar tarapynan oń qoldaýǵa ıe bolǵan festıval jumysy otandyq anımasııa salasy men kórermen úshin eleýli jańalyq bolyp otyr. Jyl saıynǵy jastardyń túsirip júrgen fılmderine nazar aý­dar­saq, bolashaq anımasııa maman­darynyń qatarǵa qosylyp kele jatqanyn ańǵaramyz. Bul rette ÁMEN anımasııalyq fılm­der festıvaliniń jas mamandar úshin baǵyt-baǵdar berýde múmkinshiligi zor.