Sybaılas jemqorlyqtyń aldyn alý baǵyttary qaraldy

Negizgi kún tártibinde memlekettik kirister, ishki memlekettik aýdıt, qarjy monıtorıngi, qazynashylyq jáne memlekettik múlik organdaryndaǵy jemqorlyqtyń aldyn alý baǵyty boıynsha ózara is-qımyl máselelerine arnaldy.

Keńeske mınıstrliktiń jáne vedomstvolyq baǵynysty komıtetterdiń, olardyń aýmaqtyq bólimsheleriniń basshy quramymen qatar Sybaılas jemqorlyqqa qarsy qyzmet janyndaǵy qoǵamdyq konsýltatıvtik-keńesshi organdardyń ókilderi qatysty.

Keńes barysynda qylmystyq-quqyqtyq statıstıka bóligindegi alańdatarlyq úrdisterdi kórsetetin jemqorlyqqa qarsy keshendi monıtorıngtiń, sondaı-aq kedendik ákimshilendirý jáne ishki memlekettik aýdıt salasyndaǵy syrtqy taldaýlardyń nátıjeleri talqylandy.

Táýekelderdiń negizgi kesheni keń dıskresııalyq ókilettiktermen, jumys úderisterin avtomattandyrýdyń jetkiliksizdigimen jáne bıznes-prosesterdiń negizgi kezeńderindegi adamı faktormen baılanysty.

Agenttik tóraǵasy A.Shpekbaev mınıstrlik basshylyǵynyń óz qataryn taza ustaýǵa, sybaılas jemqorlyq táýekelderin anyqtaý sapasyn qamtamasyz etýge jáne olardy joıýǵa nıet bildirmeıtin laýazymdy tulǵalarǵa qatysty berik ustanymynyń asa mańyzdylyǵyna nazar aýdardy.

Ol salyq jáne keden organdarynyń tutynýshyǵa baǵdarlanýyn arttyrý qajettiligi týraly aıta kelip: "Qarjy salasy erekshe ashyqtyqty, aıqyndylyqty jáne qoljetimdilikti talap etedi. Jemqorlyq dál osy qaǵıdattardan seskenedi. Jańa kózqarastaǵy basshylar azamattarmen syndarly dıalog júrgize bilýimen jáne jaǵdaıdy jaqsy qyryna ózgertý nıetimen erekshelenedi. Jemqorlyq quqyq buzýshylyqtar jasaýǵa bolmashy múmkindik bermeý úshin sıfrlyq sheshimder men quraldar engizýdi jedeldetý qajet".

Qarjy mınıstri Erulan Jamaýbaev: "Mınıstrlik qurylymynda 5 Komıtet pen 3 vedomstvolyq baǵynysty uıym bar. Sybaılas jemqorlyqqa qarsy is-qımyl sharalaryna erekshe mán beremiz. Búkil sala týraly qoǵamnyń jaǵymsyz pikirin týdyratyn sottalǵan qyzmetkerlerdiń sany alańdaýshylyq týdyratyny sózsiz. Búgingi kezdesý qalyptasqan jaǵdaıdyń ózgeretinine senimimizdi bekitti. Biz ózin-ózi jetildirý boıynsha keshendi sharalar qabyldaýǵa bettedik. Agenttiktiń usynymdary men usynystaryn eskere otyryp, birlesken kúsh-jigerimizben qalyptasqan qolaısyz úrdisti ózgerte alatynymyzǵa senimdimin".

Sondaı-aq, qarjy vedomstvosynyń basshysy elektrondyq memlekettik qyzmet kórsetý deńgeıin 92%-ǵa jetkizýge nıetti ekenin bildirdi.

Qatysýshylar Agenttiktiń "Atameken" UKP-men birlesip iske asyryp jatqan qazynalyq tólemderdi zańsyz qosa esepteýmen, ákimshilik kedergiler men kidiristerge baılanysty máselelerdi quqyqtyq alańda sheshýge baǵyttalǵan bıznes pen ınvestorlardy sybaılas jemqorlyqqa qarsy súıemeldeý jónindegi jobany (12,5 trln teńge kólemindegi ınvestısııalary bar 550-den astam kompanııa) talqylady.

Osy rette Alık Shpekbaev: "Kóbine qarjy salasynyń qyzmetkerleri azamattar men bıznestiń jetkilikti senimine ıe emes. Bul tásildi ózgertý kerek. Kásipkerlerdi qoldaý – bul sizdiń uzaq merzimdi ınvestısııalar tartýǵa, onyń ishinde adamı kapıtalǵa, tehnologııalardy damytýǵa, jumys oryndaryn qurýǵa, ıaǵnı elimizdiń barlyq azamattarynyń ál-aýqatyn arttyrýǵa qosqan úlesińiz bolmaq".

Qarjy mınıstrligi azamattyq qoǵamnyń belsendi ókilderi qatarynan basshy taǵaıyndaı otyryp, "Adaldyq alańy" jobalyq keńsesi jumysynyń tıimdiligin kúsheıtedi. "Kóleńkeli ekonomıkany tómendetý, bıznesti qorǵaý jáne sybaılas jemqorlyqqa qarsy is-qımyl jónindegi Jol kartasy", sondaı-aq "Qarjy monıtorıngi organdaryndaǵy jemqorlyqqa qarsy 10 qadam" sybaılas jemqorlyqqa qarsy baǵdarlamasy iske asyrýdyń jańa kezeńine kóshti.

"Ashyq bıýdjet" jobasynyń jetekshisi Rahym Oshaqbaev azamattardyń qarjylyq saýattylyǵy týraly aıta kele, birlesken tıisti oqytý is-sharalaryn ótkizý qajettigin atap ótti. Qarjy vedomstvosy qazynashylyqtyń jáne "e-Planning" aqparattyq júıelerimen ıntegrasııalaý bóliginde "Ashyq bıýdjetterdiń ınteraktıvti kartasy" jobasyn iske asyrýǵa da járdemdesedi.

Áriptestikti nyǵaıtý aıasynda bıyl qazan aıynda sybaılas jemqorlyq táýekelderine syrtqy taldaý júrgizý nátıjeleri boıynsha ázirlengen Ishki memlekettik aýdıt komıtetinde sybaılas jemqorlyq táýekelderin joıý jónindegi Agenttik pen Qarjy mınıstrliginiń birlesken josparyna qol qoıyldy.