Prezıdent • 29 Qazan, 2020

Memleket basshysy Ishki ister mınıstrliginiń keńeıtilgen alqa májilisin ótkizdi

25 ret kórsetildi

Memleket basshysy Qasym-Jomart Toqaev Ishki ister mınıstrliginiń keńeıtilgen alqa májilisin ótkizdi, dep habarlaıdy Egemen.kz.

Qasym-Jomart Toqaevtyń tóraǵalyǵymen Ishki ister mınıstrliginiń keńeıtilgen alqa májilisi ótti. Jıynda bıylǵy 9 aıda ishki ister organdary atqarǵan jumystyń qorytyndylary jáne Prezıdent tapsyrmalaryn oryndaý barysy qaraldy.

Sharaǵa IIM qyzmeti men polısııanyń aýmaqtyq departamentteriniń basshylary jáne elimizdiń barlyq aımaqtarynyń ýchaskelik ınspektorlary qatysty.

Memleket basshysy jıynǵa deıin ishki ister organdaryna qarasty arnaıy tehnıkalardy qarap shyǵyp, Nur-Sultan qalasy Polısııa departamenti Jedel basqarý ortalyǵynyń qyzmetimen tanysty.

Prezıdent koronavırýs pandemııasy kezinde ýaqytpen sanaspaı óz mindetterin abyroımen atqarǵan ishki ister organdarynyń barlyq qyzmetkerlerine rızashylyq bildirdi.

Memleket basshysy IIM júıesindegi kúndelikti jumystyń qaýip pen qaterge toly ekenin atap ótti. Prezıdenttiń aıtýynsha, Táýelsizdik jyldarynda óziniń qyzmettik mindetterdi oryndaý kezinde 797 polıseı qaza taýyp, 2604 qyzmetker aýyr dene jaraqattaryn alǵan.

– Memlekettiń turaqtylyǵyn jáne qoǵamnyń bereke-birligin saqtaý – basty mindet. Osyndaı sátte polısııa qyzmetkerleriniń kásibı deńgeıine, otanshyldyq rýhyna, qajyr-qaıratyna kóp nárse baılanysty. Muny ishki ister organdarynyń barlyq qyzmetkerleri jete túsinedi dep oılaımyn, – dedi Prezıdent. 

Qasym-Jomart Toqaevtyń pikirinshe, bıyl Qordaı aýdanynda jáne Sátpaev qalasynda bolǵan qaıǵyly oqıǵalardan sabaq alý qajet.  

– Beıbit kúnde halqymyzdyń amandyǵyn, bereke-birligin saqtaı almasaq, memleketimizge syn. Ultaralyq kelisim men tatýlyq, qoǵamdaǵy turaqtylyq – bizdiń basty qundylyqtarymyz. Halyqtyń kóńili alańsyz, uıqysy tynysh bolýy kerek. Polısııa tártip saqshysy ekenin sóz júzinde emes, is júzinde dáleldeı bilýge tıis, – dedi Memleket basshysy.

Prezıdent ishki ister organdary men azamattardyń ózara qarym-qatynasynda qyzmet kórsetý modelin engizý mańyzdy ekenin, oǵan «polısııa qadamdyq qoljetimdilikte» qaǵıdatyn negizge alý kerektigin atap ótti.

– Ýchaskelik ınspektor – belgili bir aýmaqtaǵy qylmysty boldyrmaýda, jergilikti halyqtyń máselelerin sheshýde, qylmystyń tikeleı nemese janamama túrde aldyn alýda, azamattardyń ómir sapasyn arttyrýda basty tulǵa sanalady. Halyqpen ashyq dıalog júrgizý kerek. Olardyń jergilikti polısııadan ne kútetinin bilip, kómek kerek kezinde qastarynan tabylýy qajet. Otandastarymyzdyń senimine basqasha ıe bolý múmkin emes, – dedi Qasym-Jomart Toqaev.

Memleket basshysy qurylymdyq ózgeristerdi jalǵastyra berýdi, onsyz qolǵa alǵan reformalardy tabysty júzege asyrý múmkin emes ekenin aıtty. Onyń oıynsha, polısııa qosalqy fýnksııalardan ókinbesten bas tartýy kerek.

– Qazir polısııa tikeleı óz mindetterine jatpaıtyn jumystarmen aınalysatyn ýaqyt emes. Bul baǵytta alǵashqy qadam jasaldy. IIM-niń quramynan tótenshe jaǵdaılar jónindegi qyzmet bólindi. Ishki ister organdary qurylymdaryn odan ári ońtaılandyrý jumystary Quqyq qorǵaý jáne sot júıesin reformalaý jónindegi komıssııanyń sheńberinde júzege asyrylatyn bolady. Biraq bul polısııanyń qyzmetin álsiretý degen sóz emes. IIM jáne onyń qurylymdyq bólimsheleri tártipti qamtamasyz etýde memlekettiń negizgi tirek kúshi bolǵan jáne solaı bola beredi, – dedi Prezıdent.

Memleket basshysy kadr saıasatyna basa mán berdi. Ol polısııa qyzmetin jańǵyrtý jónindegi jol kartasy aıasynda vedomstvolyq oqytý mekemeleri qaıta uıymdastyrylyp, qyzmetkerlerdi irikteý jumysy jetildirilgenin atap ótti.

– Polısııada dórekilik pen biliksizdikke jol berilmeýi kerek. Munda joǵary daıyndyqpen kelgen jáne óz isine shynaıy berilgen mamandar jumys isteýi qajet. Memleket pen qoǵam ońtaıly ózgeristerdi kútip otyr. Tártip saqshylary azamattarǵa úlgi bolýǵa tıis, – dedi Qasym-Jomart Toqaev.

Prezıdent polısııa qyzmetin sıfrlandyrý, zańsyz esirtki aınalymymen kúresti kúsheıtý, túzetý júıesiniń jaǵdaıyn jaqsartý kerek ekenin málimdedi.

– Eldegi kúrdeli áleýmettik-ekonomıkalyq jaǵdaıda qylmystyń órshýine jáne túrme «tártibiniń» taralýyna múlde jol berýge bolmaıdy. Ondaǵy jaǵdaıdyń asa máz emes ekeni málim. Bas bostandyǵynan aıyrmaı jazalaýǵa qatysty túıtkilder bar. Mınıstrlik qylmystyq-atqarý júıesindegi máselelerdi sheshý boıynsha nátıjeli jumystar kórsetýi kerek, – dedi Memleket basshysy.

Prezıdent óz sózinde Qazaqstan Táýelsizdiginiń 30 jyldyǵyna oraı, zańǵa sáıkes, azamattarǵa jáne jalpy memleketke qaýip keltirmeıtin qylmys jasaǵan adamdarǵa amnıstııa jasalatynyn jetkizdi.

Sondaı-aq Qasym-Jomart Toqaev Úkimetke elordalyq polısııa departamentine jańa ǵımarat salý máselesin tapsyrdy.

Memleket basshysy polısııa qyzmetkerlerin jan-jaqty áleýmettik qoldaý negizgi mindetterdiń biri ekenin aıtty. Prezıdent tártip saqshylaryna baspana jaldaýǵa ótemaqy retinde 15 mıllıard teńgeden astam qarjy bólinetinin jetkizdi. Keler jyldyń 1 qańtarynan bastap osy maqsattarǵa qosymsha 10 mıllıard teńge bólinedi. Bul shara aıasynda kezekshi bólimniń qyzmetkerleri, qaraýyl qyzmeti, arnaıy kúzet uıymdary, vedomstvolyq oqý mekemeleri jáne qylmystyq-atqarý júıesiniń qyzmetkerleri qamtylyp, jalpy 8 myń adamǵa qoldaý kórsetiledi.

Qasym-Jomart Toqaev ishki ister salasy qyzmetkerleriniń eńbekaqysy tómen ekenin aıtty. Bul kópten beri qordalanǵan máselelerdi biri. Osyǵan oraı ol Úkimetke 3 jyldyń ishinde tártip saqshylarynyń eńbekaqysyn 30 paıyzǵa kóterý týraly tapsyrma berdi.

Prezıdent barlyq memlekettik basqarý júıesine úlken synaq bolǵan COVID-19 pandemııasy kezinde polısııa qyzmetkerleriniń erekshe eńbegin atap ótti.

– Qazirgi jaǵdaıda dárigerlermen qatar maıdannyń alǵy shebinde polısııa qyzmetkerleri de júr. О́ıtkeni azamattardyń qaýipsizdigi ǵana emes, olardyń densaýlyǵy men berekeli ómiri sizderdiń jumystaryńyzǵa tikeleı baılanysty. Sondyqtan búgingideı kúrdeli jaǵdaıda memleket indetke qarsy turǵandardyń barlyǵyn qoldaıdy. Meniń tapsyrmam boıynsha pandemııanyń birinshi kezeńinde karantın sharalaryn qamtamasyz etýge qatysqan ishki ister organdarynyń qyzmetkerlerine syıaqy tóleýge 6,6 mıllıard teńge bólindi. Jyl sońyna deıin taǵy da 11,5 mıllıard teńge beriledi, – dedi Memleket basshysy.

Prezıdent sóz sońynda joǵaryda atalǵan mindetterdi tolyq oryndaý qajet ekenin aıtyp, IIM bul jumysty abyroımen atqaratynyna senim bildirdi.

Alqa májilisinde Ishki ister mınıstri Erlan Turǵymbaev sóz sóılep, Prezıdentke elimizdegi qylmystyq jaǵdaı, azamattardyń qaýipsizdigin qamtamasyz etý sharalary, quqyq buzýshylyqtyń aldyn alý, uıymdasqan qylmysqa qarsy is-qımyldar, adam saýdasy, esirtki jáne tonaý qylmysy jaıynda baıandady. Mınıstr ishki ister organdaryna reforma júrgizý, «Halyq únine qulaq asatyn memleket» tujyrymdamasy aıasynda polısııa jumysynyń jarııalylyǵy men ashyqtyǵyn qamtamasyz etý sharalary jóninde Memleket basshysy bergen tapsyrmalardyń oryndalý barysy týraly da aqparat berdi.

Jıynda budan bólek Nur-Sultan qalasy Polısııa departamentiniń bastyǵy Erjan Sádenov jáne Aqtóbe oblysy Polısııa departamentiniń ýchaskelik ınspektory Narıman Ýlıanov baıandama jasady. 

Sońǵy jańalyqtar

Siz bilesiz be?..

Ádebıet • Keshe

Máńgilik saýalǵa mándi jaýap

Rýhanııat • Keshe

Kúnikeıdiń jazyǵy

Ádebıet • Keshe

Kesteli oramal

Rýhanııat • Keshe

Eki «sarynyń» aıqasy

Kásipqoı boks • Keshe

Elordada jańa alleıa ashyldy

Ekologııa • Keshe

Qıly-qıly taǵdyrlar

Tarıh • 09 Mamyr, 2021

Tozaqtan ótse de túńilmegen

Rýhanııat • 09 Mamyr, 2021

Radıst qazaq qyzdary

Tarıh • 09 Mamyr, 2021

Qarsy barlaýshylar qaharmandyǵy

Rýhanııat • 09 Mamyr, 2021

Maıdangerdiń ónegeli joly

Rýhanııat • 09 Mamyr, 2021

Rjev shaıqasynyń qaharmany

Tarıh • 09 Mamyr, 2021

Turlaýy qıyn taǵdyrlar

Tarıh • 09 Mamyr, 2021

Uqsas jańalyqtar