Jınalysqa Komıssııanyń qos taraptaǵy teń tóraǵalary, jaýapty mınıstrlikter ókilderi, eki eldiń ókiletti elshileri qatysty. Qazaqstan tarapyn Ekologııa, geologııa jáne tabıǵı resýrstar mınıstri Maǵzum Myrzaǵalıev, Rýmynııa jaqty eldiń energetıka jáne iskerlik orta mınıstri Vırdjıl-Danıel Popeský basqardy.
M.Myrzaǵalıev Rýmynııa ókilderine áriptestik aıasyn keńeıtýdi usynyp, jańa baǵyttar boıynsha birlese jumys isteýge shaqyrdy.
Atap aıtqanda, qatty turmystyq qaldyqtardy óńdeý arqyly energııa alý boıynsha usynys jasady.
"Qazir Qazaqstan "Waste to Energy" mehanızmin, ıaǵnı qaldyqtardy termııalyq ýtılızasııalaý máselesin qarastyryp jatyr. Elimiz 7 qoqys jaǵatyn zaýyt salýdy josparlaýda. Rýmyn kompanııalaryn atalǵan jobaǵa qatysýǵa shaqyramyn", - dedi Ekologııa mınıstri.
Sonymen birge Maǵzum Myrzaǵalıevtiń pikirinshe, Qazaqstan men Rýmynııa Kaspıı teńizinde salqyn sýǵa beıimdelgen losos, forel sııaqty balyqtardy ósirý, balyq sharýashylyǵyna arnalǵan azyq óndirý boıynsha áleýetti áriptestik ornata alady.
2019 jyly Qazaqstanda balyq jáne balyq ónimderi óndirisi 52 myń tonnany qurady. Eksport 30 myń tonnaǵa jetti (60 mln AQSh dollary).
"Kaspıı teńizindegi balyq sharýashylyǵy áleýeti 500 myń tonnaǵa jetedi. Kórshi elderdiń eksportqa arnalǵan potensıalyn jáne yńǵaıly ornalasýyn eskere otyryp, rýmyn kompanııalaryn atalǵan salaǵa ınvestısııa salýǵa shaqyramyn", - dep aıtty Ekologııa mınıstri.
Taraptar ekonomıka, saýda jáne ınvestısııa, ónerkásip, densaýlyq saqtaý, ǵaryshty ıgerý jáne taǵy basqa salalar boıynsha da ekijaqty áriptestik máselelerin talqylady.
Jınalys qorytyndysy boıynsha Qazaqstan-Rýmynııa Úkimetaralyq komıssııasynyń 15-shi otyrysynyń saýda-ekonomıkalyq jáne ǵylymı-tehnıkalyq áriptestik týraly hattamasyna qol qoıyldy.
