Keńesti ashqan O. Bekeev elimizdiń temirjol jáne áýe kóligi nysandaryndaǵy jedel jaǵdaıǵa jan-jaqty toqtaldy.
Onyń aıtýynsha, aǵymdaǵy jyldyń basynan beri kólik polıseıleri áýe jáne temirjol kóligimen tasymaldanǵan 15 mıllıonnan astam azamattyń qaýipsizdigin qamtamasyz etken.
О́z sózinde vedomstvo basshysy qabyldanǵan aldyn alý sharalarynyń nátıjesinde qylmystar sanyn 27,1%-ǵa tómendetýge qol jetkizilgenin atap ótti. Osy jyldyń 9 aıynda barlyǵy 1159 qylmystyq quqyq buzýshylyq tirkeldi. Olardyń jalpy ashylýy 91%-dy qurady.
Túrli quqyq buzýshylyqtary úshin 32498 azamat ákimshilik jaýapkershilikke tartyldy. Sondaı-aq esirtkiniń zańsyz taralý faktilerin anyqtaýǵa jáne jolyn kesýge baǵyttalǵan sharalar iske asyryldy. Departament bólinisteriniń kúshimen 155 kılogramnan asa ártúrli esirtki zattary tárkilendi.
Keńes barysynda El Prezıdenti Q.K. Toqaevtyń Qazaqstan halqyna Joldaýyn iske asyrý, sonyń ishinde ishki ister organdaryn reformalaý, "halyq únine qulaq asatyn memleket" tujyrymdamasy aıasynda polısııa jumysynyń ashyqtyǵy men aıqyndyǵyn qamtamasyz etý jónindegi máseleler keńinen talqylandy.
"Memlekettiń turaqtylyǵyn jáne qoǵamnyń bereke-birligin saqtaý – basty mindet. Osyndaı sátte polısııa qyzmetkerleriniń kásibı deńgeıine, otanshyldyq rýhyna, qajyr-qaıratyna kóp nárse baılanysty", - dedi Prezıdent Q.K. Toqaev IIM-niń keńeıtilgen alqa otyrysynda.
"Bul Memleket basshysynyń naqty tapsyrmasy. Birinshiden, polısııada tek kásibı mamandar qyzmet etýi qajet. Ekinshiden, bolashaq polısııa qyzmetkeriniń joǵary moraldyq qasıetteri, adal, ádepti jáne fızıkalyq daıyndyǵy da shyńdalǵan bolýy qajet. Ol qandaı mańyzdy laýazymda qyzmet atqaratynyn jáne qanshalyqty jaýapty ekenin tolyqqandy túsinýi qajet", - dedi polısııa polkovnıgi.
Budan soń birqatar aýmaqtyq bólinis basshysynyń baıandamalary tyńdaldy.
Shara barysynda kadr saıasatyna basa nazar aýdaryldy. Sonymen qatar polıseılerdiń qyzmettik-jaýyngerlik daıyndyq deńgeıin kóterý jáne jeke quram arasyndaǵy tártipti nyǵaıtý máseleleri aıtyldy.
O. Bekeev keńesti qorytyndylaı kele, bólinis basshylaryna jedel qyzmetti kúsheıtý, qylmystardy izin sýytpaı ashý, quqyqbuzýshylyqtardyń aldyn alý, adamdar kóp shoǵyrlanatyn temir jol qozǵalysynda, áýejaı nysandarynda, vokzaldar men perrondarda qoǵamdyq tártip pen azamattardyń qaýipsizdigin qamtamasyz etý boıynsha birqatar mindetter qoıdy.
