Qazan aıynda qaladaǵy indet juqtyrýdyń údeýi karantın sharalaryn jeńildetýge múmkindik bermeıdi. О́kinishke qaraı turǵyndar saqtyq sharalaryn eskere bermeıdi, al aýyrǵan jaǵdaıda baılanysqan adamdaryn ashyq aıtpaı, faktilerdi jasyrady.
«Sońǵy ýaqytta koronavırýs ınfeksııasymen aýyratyn naýqastardyń turǵylyqty jeri men jumys orny boıynsha, sondaı-aq jaqyn baılanysta bolǵandar týraly faktilerdi jasyrý jáne jalǵan aqparat berý jıilep ketti. Bul epıdemııaǵa qarsy is-sharalardy ýaqtyly júrgizýge kedergi keltiredi», dedi J.Pirálıeva.
Sondaı-aq bıznes sýbektileri shekteý sharalaryn, sanıtarlyq normalar men karantın rejimin elemeı otyr. Buǵan 27 jáne 28 qazanda monıtorıngtik toptar júrgizgen kúndizgi jáne túngi reıdterdiń nátıjeleri dálel bola alady. Tekserilgen 290 nysannyń 49-ynda talaptardyń oryndalmaǵany anyqtaldy.
«Meıramhanalarda kóptegen adam shaqyryp, otbasylyq is-sharalar ótkizý áli de bar. Mysaly, 24 qazanda Turan dańǵyly, №5 mekenjaıyndaǵy GRANDHALLASTANA meıramhanasynda 70-ten asa adam boldy. Onda «Qyz uzatý» toıy ótip, 50 adam qatysty, al týǵan kún zalynda 20 adam boldy», dedi Nur-Sultan qalalyq PD jergilikti polısııa qyzmeti basqarmasynyń bastyǵy Gosman Jakın.
Sondaı-aq mobıldi top Manas kóshesindegi «Poshashlychım» dámhanasy men «Janym-sol» karaoke-barynda jumys kúnderi jáne demalys kúnderi belgilengen jumys kestesin saqtamaı, óz qyzmetin júzege asyrǵan tártipsizdikti anyqtady. Tyıym salynǵan ýaqytta Turan dańǵyly, 19 úıdegi Fast425 túngi klýby da jumys istedi.
«Qurmetti elorda turǵyndary men qonaqtary, aınalańyzdaǵy adamdardyń densaýlyǵy men ómirine qamqorlyqpen qaraýyńyzdy suraımyz. Ol úshin tek qarapaıym erejelerdi saqtaý kerek: mindetti túrde medısınalyq maska taǵý, áleýmettik qashyqtyqty saqtaý, adamdar kóp jınalatyn jerlerge barmaý kerek», dedi Bas sanıtarlyq dáriger.
