«Jastar korpýsyn damytý» jobasynyń qatysýshysy Aslanbek Tólepbekov – tis tehnıgi mamandyǵy boıynsha atalǵan oqý ornynda tálim alýshylardyń biri. 2020 jyly Zhasproject jobasy jaıynda estigen keıipkerimiz «Áleýmettik tis kabınetin» ashýdy kózdeıdi. Osylaı áleýmettik joba baıqaýyna qatysyp, 1 mln teńge kóleminde qarjy utyp alady.
Áleýmettik jobaǵa Aslanbekpen qatar Ilııas Álimbaev, Mánshúk Naımanova jáne Álisher Tólepbekov sııaqty jastar da qatysty. Qazirgi ýaqytta olar alǵan bilimin tis kabınetinde tájirıbemen ushtastyryp júr.
Áleýmettik jobanyń novatory Aslanbek bala kezinen óte zerek, alǵyr bolyp, mektep tabaldyryǵynda túrli olımpıadalardyń júldegeri atanǵan. Ol 18 jasynda jaısyz oqıǵaǵa tap bolyp, bul keleńsiz jaǵdaı keıin ony tis tehnıgi bolýǵa ıtermelegen. Jaǵyna ota jasatý kezinde kúretamyryna skalpel tıip ketip, Aslanbek estý qabiletinen aırylyp qalady. Biraq dárigerdiń bul qateligi onyń armandaryna kedergi bolmady. Qaıta Aslanbek bar jigerin jınap, mamandyǵy arqyly qarapaıym halyqqa kómekteskisi keledi.
Qaladaǵy jekemenshik klınıkalarda tis tehnıkterin jumysqa qabyldaı bermeıdi eken. Alaıda Aslanbek pen onyń dostary buǵan qamyǵa qoımaıdy. «Jastar korpýsyn damytý» jobasynan alǵan somaǵa olar jeke klınıkasyn ashty. Taldyqorǵan joǵary medısına kolledji men «Qazaq sańyraýlar» qoǵamynyń aýdarmashysy Marat Jumabekovtiń qoldaýymen jastarǵa tegin kabınet berildi. Zhasproject jobasy arqyly Aslanbek bastaǵan jastar tis kabınetine qajetti medısınalyq qural-jabdyqtardy satyp aldy. Qazir munda aıyna 10-nan asa adamǵa protez jasalyp jatyr. Aldaǵy ýaqytta kelýshilerdiń sany áli de ósedi degen úmit bar.
Jalpy Taldyqorǵan qalasynda bir protezdiń baǵasy – 30 myń teńge kóleminde. Mysaly, stomatologııalyq klınıkaǵa kelgen klıentten arnaıy aýyz qýysynyń úlgisi alynady, ol arnaıy algınatty tis tehnıgine joldanady. Al tis tehnıgi túsken tapsyrysty úlgi arqyly oryndap, kaıta jóneltedi. Osyndaı tis protezin Aslanbek pen onyń joldastary aqysyz jasap berip otyr. Osylaısha, halyqtyń áleýmettik jaǵdaıyna qarasyp, qoldan kelgen kómegin kórsetip jatqan jastardyń bul isi kópke úlgi.
Jas tis tehnıkteriniń alǵa qoıǵan jospary kóp. Olar munymen toqtap qalmaı, 12 stomatologııalyq qyzmet túrin kórsetýdi maqsat tutyp otyr. Jobadan buıyrǵan qarjy jastarǵa úlken múmkindik berip qana qoımaı, aınalasyndaǵy aǵaıynǵa kómektesýine jaǵdaı jasady. Aslanbek Zhasproject jobasy bolashaqqa batyl qadam jasaýyna jol ashqanyn aıtyp, jastarǵa osyndaı qoldaý bolǵanyna rızashylyǵyn bildirdi.
