Kesh shymyldyǵyn Rıkardo Amaranteniń «Longing» («Qushtarlyq») bir aktili baleti ashty. Adamdardyń qarym-qatynasy jaıly oı tolǵaıtyn balettiń álemdik premerasy álimsaqtan beri mazalap kele jatqan suraqtardyń jaýabyn zamanaýı horeografııa tiliniń kómegimen izdeýge talpynypty.
«Rıkardonyń stılin biz tolyq meńgerip aldyq: onyń baletterin qalaı bıleý keregin umytqan joqpyz, sol sebepti horeografııanyń ózi qıynǵa soqpady. Repetısııa jyl basynda ótip, kóktemde premerasy ótýi tıis edi, biraq karantın jarııalanǵandyqtan, premera kúni shegerildi. Sahnaǵa qaıta oralyp, kórermendi kórý, onyń energetıkasyn seziný erekshe qýanysh syılaıdy. Meniń oıymsha, osy premeralardan keıin ártisterdiń bári baqytqa bólengen shyǵar», deıdi jetekshi solıst Farhad Bórıev.
Rıkardo Amaranteniń aıtýynsha, bul qoıylymnyń da kórkemdik bezendirilýinde mınımalızm basym. Jaryqty oınata otyryp, baletmeıster men jaryq dızaıneri Robert Daýtov sahnadaǵy áreketti tamashalap otyrǵan kórermendi tús kórgendeı áserde qaldyrdy.
«Mundaıda sahnadaǵy áreket aıqyn kórinbeıdi, qara túnek jarq etken sáýlemen bir sátke ashylady. Osy atmosferany sahnada jaryq, tútin men ekran arqyly berýge tyrystyq», deıdi horeograf.
Kostıým sýretshisiniń aıtýynsha, balettegi ár beıne kómek kórsetip, jol silteıtin sekildi. «Aq tús – sahnadaǵy árekettiń tús ekenin meńzeıdi. Munda oǵan perishte beınesindegi minsiz tulǵa elesteıdi, qara tús shynaıy ómirdi bildiredi. Al úshinshi bólimde ártister adam táni tústes kıim kıip shyǵýy, bul – materıaldyq álemnen ada adam janynyń allegorııasy. Bul bólimde adamdar jandarmen kezdesedi», deıdi Paýla Roza Santana.
«Longing» – Rıkardo Amaranteniń «Astana Balet» teatryna arnap qoıǵan onynshy baleti. Osy týyndysymen baletmeıster elordalyq teatrdaǵy jumysyn támamdaıdy.
Ekinshi bólimde kórermen nazaryna «Instinct» («Instınkt») bir aktili baleti usynyldy. Astanalyq kórermen «Astana Balet» teatrynyń jetekshi solısti Devıd Djonatannyń qoıýshy-horeograf retindegi eńbegimen alǵash tanysty. «Maǵan osynshalyqty senim artqany men úshin zor mártebe. Bul teatrdyń ártisteri ǵalamat. Olar meniń stılimdi, qımyldarymdy jyldam úırendi. Buǵan alǵysym sheksiz, sebebi daıyndalýǵa ýaqytymyz óte az edi», dep atap ótti horeograf. Abstraksııaly balette horeograf jaqyn adamyńnan jyraqta qalý taqyrybyn qozǵaıdy. Qazirgi pandemııa men shekaranyń jabylǵan tusynda bul óte ózekti taqyrypqa aınaldy. Munda birtutas mýzyka men plastıka kezdesýge asyq jandardyń ishki kúıinishin sýretteıdi.
