Djohar buǵan deıin de kóshedegi kreatıvti art-jumystarymen kópshilikti súısintip júrgen edi. Bul joly da tabıǵattyń tosyn minezinen qoryqpaı, táýekel etken top toqtamaı 10 saǵat boıy jumys istegen.
– Bul joba meniń ómirimdegi eń órshil ári qıyn jobaǵa aınaldy. Munyń bári nege kerek, maǵan bola búkil QazUÝ japyraq jınap jatyr. Qane, endi jaýap ber dep bir kún qalǵanda oılana bastadym, – deıdi sýretshi.
«Táýekel túbi – jelqaıyq, ótesiń de ketesiń» demekshi, jınalǵan 50 qap japyraqtyń baýyn sheship jiberip, jumysqa kirisip ketken toptyń maqsaty aıqyn bolǵanymen, nátıjesi bir Qudaıǵa aıan edi.
– Sóıtip júrgende fılosoftyń taqııasynyń jartysyn da jappaı japyraǵymyz taýsyldy. Sodan keıin jel turyp, quıyndatyp ketkende tabıǵattyń kúshine qarsy kelip jatyrmyz dep kúdiktene bastadym. Bárin tastap, tyrmalap jatqan balalardy úıge qaıtarsam ba dep te oılandym. Biraq men ony kórsetpeýge tyrystym, – deıdi Djohar.
Birligi jarasqan eńbekqor top kesh qaraıǵanǵa deıin tapjylmaı jumys istep, jumysty oıdaǵydaı aıaqtaǵan. Qarańǵy túsip ketkendikten portretti foto, vıdeoǵa túsirý múmkin bolmaı, úıdi-úıine tarqaýǵa týra kelgen. Tań ata qaıta jınalǵan shyǵarmashylyq top naǵyz keremettiń kýási bolǵan edi.
– Kesh batyp ketip, portretti túsirip úlgermedik. Qalǵan jumysty tańǵa qaldyrýǵa týra keldi. Túni boıy jel ushyryp ketpesin dep tiledim. Tańerteń biz kelgen búkil stadıon alańy tańǵy shyqpen kómkerilip, bir japyraǵy da qısaımapty. Men komandamnyń kózinen senimdi, táýekeldi kórdim. Árqaısysyna jeke rahmetimdi aıtamyn, – deıdi ol.
Qala turǵyndaryn kútpegen jerden qýantyp júrgen sýretshiniń osyǵan deıin dana Abaıdyń, Dımashtyń portretine arnalǵan jumystary áleýmettik jelilerde keń qoldaýǵa ıe bolǵan edi. Álemniń ekinshi ustazyna arnalǵan bul jumysy da óner aıasynyń, qııal kókjıeginiń sheksiz ekendigin kórsetip berdi.
