О́ner merekesine túrki elderiniń, atap aıtqanda, Túrkııa, О́zbekstan, Qyrǵyzstan, Tatarstan jáne Bashqurtstan ókilderi qatysty. Festıvaldiń ashylýyna oraı otandyq mýltıplıkasııa salasyna jaýapty qurylymdar men anımasııa mamandarynyń qatysýymen «Qazaq anımasııasynyń kókeıkesti máseleleri» taqyrybynda onlaın dóńgelek ústel ótti. Festıval prezıdenti ári dóńgelek ústel moderatory Maqpal Jumabaı festıvaldiń maqsaty men mindetine toqtalyp, jyl ótken saıyn jańa qarqyn alyp kele jatqan jobanyń ómirsheń, óristi bolýyna beıildi ekenin jetkizdi. Ámen Qaıdarovtyń izbasary, Eńbek sińirgen qaıratker Jáken Dánenov festıvaldiń ashylýymen quttyqtap, aq jol tiledi. Irgeli óner salasynyń búgingi damýy jaıynda sóz qozǵaı kelip, el aýmaǵynda habar taratatyn sheteldik balalar arnalarynyń ónimderin qazaq tiline aýdarý jaıly usynys bildirdi.
Festıvaldiń ashylýyna qatysqan Aqparat jáne qoǵamdyq damý vıse-mınıstri Bolat Tilepov mınıstr Aıda Balaevanyń quttyqtaýyn jetkizdi. «Qoǵamymyzdyń keleshek gúldenýi de, ómirimizdiń ónegeli túrlenýi de, jas urpaqqa berer búgingi tárbıemiz de tálim-tárbıege, úlgi-ónegege baılanysty ekeni anyq. Bul rette elimizdegi qazaq anımasııasynyń basy-qasynda júrgen talant ıeleri ulttyq mýltıplıkasııanyń básekege qabilettiligin shyńdap, sonyń ishinde qazaq tildi balalar kontentiniń aýqymyn keńeıtip, qarqynyn odan ári údetedi dep senemiz. Árıne bul baǵyttaǵy arqalap júrgen júktiń salmaǵy aýyr. Sondyqtan osy izgi sharýaǵa bel sheshe kirisip, berekesin keltirip júrgen otandyq anımatorlar qaýymyna zor alǵysymdy aıtamyn», delingen hatta.
Mádenıet jáne sport mınıstri Aqtoty Raıymqulovanyń festıval uıymdastyrýshylaryna joldaǵan quttyqtaýyn jetkizgen mınıstr keńesshisi Erlan Jurynbaev otandyq kınoóndirýshilerdi qoldaý maqsatynda mınıstrlik zańnamalyq máselelerdi keshendi túrde sheship jatqanyn málimdedi.
Mádenıet jáne sport mınıstrligi Til saıasaty komıtetiniń tóraǵasy Ádilbek Qaba anımasııanyń ultty tárbıeleýshi strategııalyq mańyzyna asa mán berip, aldaǵy ýaqytta komıtet tarapynan birqatar máıekti jobalar men sheshimderdiń júzege asyrylatynyn atap ótti. Budan bólek, jıynda «Rýhanı jańǵyrý» qazaqstandyq qoǵamdyq damý ınstıtýty» KeAQ «Rýhanı jańǵyrý» ortalyǵynyń basshysy Janar Boqanova memlekettik tildi damytýdaǵy anımasııanyń róli jaıynda aıta kelip, «Rýhanı jańǵyrý» baǵdarlamasy aıasynda memlekettik jáne jekemenshik seriktestikke qurylǵan arnaıy baǵdarlama qabyldaıtyn ýaqyt kelgenin, sol sebepti anımasııany damytý boıynsha arnaıy jol kartasy daıyndalatynyn jetkizdi.
Al «Balapan» telearnasynyń bas prodıýseri Sandýǵash Baımahanqyzy balalar arnasynyń mýltıplıkasııa salasyn damytýǵa qosyp jatqan úlesi zor ekenin atap ótti. Iаǵnı «Balapan»-nyń otandyq naryqtaǵy anımasııalyq jobalardyń 90 paıyzǵa jýyǵyn óndiretinin aıta kele, qazaq tilindegi anımasııalyq kontenttiń sanyn arttyryp, tapsyrys kózderin kóbeıtý máselesin alǵa tartty.
Dóńgelek ústel barysynda Ulttyq kınony qoldaý memlekettik ortalyǵy basqarma tóraǵasynyń orynbasary Aıdar Asqaruly kıno ortalyqtyń qarjylandyrýymen júzege asyrylǵan anımasııalyq jobalarǵa toqtalyp, otandyq mýltıplıkator mamandarǵa rızashylyǵyn jetkizdi. Sondaı-aq Sh.Aımanov atyndaǵy «Qazaqfılm» AQ anımasııalyq stýdııasynyń basshysy Adaı Ábdilda anımasııa salasynda bilim granttaryn kóbeıtý jáne jas mamandardyń álemdik ozyq anımasııalyq stýdııalarda kásibı taǵylymdamadan ótip, tájirıbe almasýyna múmkindik jasaý jaıynda sóz qozǵady. Odan bólek, jıynǵa qatysýshy ózge de mamandar tarapynan stýdııalardy tehnıkalyq modernızasııadan ótkizý úshin memleket tarapynan sýbsıdııa bólý tájirıbesi, otandyq tolyqmetrli anımasııalyq fılmderdiń prokattyq kórsetilimin uıymdastyrý máselesi de aıtyldy.
Sondaı-aq festıval aıasynda úsh el mamandarynyń atsalysýymen 11 sheberlik synyby uıymdastyrylyp, oǵan 100-den asa qatysýshy tirkeldi. «Qazaq anımasııasynyń retrospektıvasy» baǵdarlamasy negizinde 16 fılm kórsetilip, otandyq «Mahambet» mýltfılminiń halyqaralyq kórsetilimi jáne túrkııalyq «Rafadan Taıfa jer asty hıkaıalary» fılminiń Qazaqstandaǵy tusaýkeseri ótti.
Baıqaýǵa tórelik etetin qazylar alqasynyń quramy bilikti mamandardan jasaqtalǵan. Olardyń qatarynda qazylar alqasynyń tóraǵasy, kınotanýshy, PhD doktory, T.Júrgenov atyndaǵy Qazaq ulttyq óner akademııasynyń «Kıno tarıhy jáne teorııasy» kafedrasynyń dosenti Baýbek Nógerbek, Mádenıet qaıratkeri, «Saq» kınostýdııasynyń bas rejısseri Batyrhan Dáýrenbekov, jazýshy-dramatýrg, Qazaqstannyń Eńbek sińirgen qaıratkeri Roza Muqanova, Japonııa anımasııasynyń rejısseri, «Netflix», «Warner Brothers», «Disney», «Mad House», «Studio 4C» kompanııalarymen birlese jumys istegen Ashıno Ioshıharý, anımasııalyq kıno rejısseri, QHR-dyń Beıjiń qalasyndaǵy «Qyran» stýdııasynyń dırektory Arysbek Muqan, «Junior Eurovision-2020» qatysýshysy Qaraqat Bashanova, rejısser, prodıýser, «Qazart» kınostýdııasynyń dırektory Qasıet Saqıolla syndy elge belgili mamandar jáne álemdik deńgeıdegi anımasııa sheberleri bar.
Uıymdastyrýshylardyń aıtýynsha, bıyl festıval qorjynyna 47 fılm usynylyp, onyń 37-si irikteýden ótken. 9 nomınasııa boıynsha júldeler taǵaıyndaldy, atap aıtsaq Danııar Ábdýkarımovtiń «Kak malchık spas svoı gorod» týyndysy «Úzdik kásibı anımasııalyq fılm», Rım Sharafýdtınovtiń «Pravıla rısovalshıka» jobasy «Úzdik rejısserlik jumys» dep baǵalandy. Al «Úzdik ssenarıı» nomınasııasyn Sergeı Kıatrovtyń «Revızskıe skazkı» fılmi ıelenip, «Úzdik qoıýshy sýretshi» júldesin Dmıtrıı Vlasovtyń «Flow» jáne Dastan Kishkentaevtyń «Alpamys» mýltfılmderi oljalady.
Sondaı-aq Tomırıs Aralbaıdyń «Chto to sprıatannoe v temnom lesý» jobasy «Úzdik stýdenttik jumys» retinde tanylyp, «Úzdik stýdenttik rejısserlik jumys» nomınasııasy boıynsha Álibı Muqyshevtiń «Lastık» jobasy marapattaldy. Al Janádil Baıdarbektiń «Yrysty ydystar» anımasııalyq serıaly «Úzdik mýlthıkaıa» bolyp tańdaldy. «Ádil qazylar júldesi» Ivan Ardashovtyń «Abaq jáne aınalý joralǵysy» jáne Seda Babaıannyń «Polet» mýltfılmderine berildi. Janat Jaılybaıdyń «Dala oıyndary» mýlthıkaıasy «Kórermen kózaıymy» ataǵyn alsa, «Úzdik komıks» konkýrsynda Elvıra Turǵynbaeva jeńiske jetti.
