Mysaly, bıyl jyly Kóksý aýdanynda jalpy uzyndyǵy 47 shaqyrym bolatyn avtokólik joly jóndelgen. Bul isti ýaqytynda aıaqtaý memlekettik baǵdarlamanyń aıasynda múmkin boldy. Osy jóndelgen joldyń 40 shaqyrymy «Jumyspen qamtýdyń jol kartasy» boıynsha jasalsa, 7 shaqyrymy «Aýyl – el besigi» baǵdarlamasynyń sheńberinde júzege asypty. Jalpy, jol kartasy aıasynda Kóksý aýdanynda quny 5 mlrd 518 mln teńge bolatyn 33 joba qolǵa alynǵan. Iаǵnı atalǵan baǵdarlamaǵa sáıkes áleýmettik jáne kólik ınfraqurylymyn damytý, bilim men mádenıet nysandaryn jóndeý, turǵyn úı-kommýnaldyq saladaǵy jobalarǵa kóńil bólingen.
– Qazir aýdanda jańadan 400 jumys orny quryldy, sonyń ishinde 268 adam jumyspen qamtý ortalyǵynyń joldamasymen ornalastyryldy. Al «Jumyspen qamtýdyń jol kartasy» aıasynda aýyldardaǵy 48 kóshede jóndeý aıaqtaldy. Taǵy 10 kósheni jóndep bitiremiz. Iаǵnı bıyl aýdanda jalpy uzyndyǵy 40 km bolatyn 58 kóshe jóndeledi, – deıdi Kóksý aýdanynyń ákimi Almas Ádil.
Aıtpaqshy, bıyl Almaty oblysynda jergilikti mańyzdaǵy joldardyń qurylysy men jóndeý jumystaryna 61,7 mlrd teńge qarastyrylǵan. Onyń ishinde 19,7 mlrd teńge «Jumyspen qamtýdyń jol kartasy-2020» baǵdarlamasy arqyly bólingen. Al aıaqtalǵan jumystyń nátıjesi boıynsha aımaqtaǵy joldardyń sapalylyq deńgeıi 84 paıyzǵa jetýi tıis. Onyń bir kórinisin joǵarydaǵy Kóksý aýdanynan baıqaýǵa bolar.
Al «Jumyspen qamtýdyń jol kartasy-2020» baǵdarlamasynyń jemisin kórgen aýdannyń kelesi mysalyn Panfılov aýdanynan alýǵa bolar. Jarkent óńirinde baıaǵdarlama aıasynda 55 joba qolǵa alynǵan. Sonyń biri – Eńbekshi orta mektebi. Irgetasy 35 jyl buryn salynǵan bilim ǵımaraty tolyqtaı shatyrynan edenine deıin jańartylýda. Jol kartasymen bólingen kúrdeli jóndeý jumystaryn «Nur-Shapaǵat Qurylys» seriktestigi atqaryp jatyr. Merdigerler qazir nysannyń ishki jumystaryn 100 paıyz aıaqtady. Endi aýlasyndaǵy abattandyrý-kógaldandyrý, jaryq shamdaryn ornatý sharýalary qalypty. Buǵan deıin tozyǵy jetken ǵımaratty qysqy maýsymda jylytý qıyn bolǵan eken. Jańartylýy kezinde osy jaǵyna basa mán berilipti. Jumyspen qamtýdyń jol kartasymen jańartylyp jatqan joba quny – 958 mln teńge. Merdigerler qurylysty mamyrdyń ortasynda bastaǵan. Sodan beri 178 jergilikti turǵyn jumysqa tartylyp otyr. Mundaǵy jumysshylardyń aılyq jalaqysy 85 000 teńgeden 200 000 teńgege deıingi aralyqta belgilengen. Aıtpaqshy, mekteptiń materıaldyq-tehnıkalyq bazasy tolyǵymen jańartylady. Bul maqsatqa qurylystan bólek 23 mln teńge qarjy bólingen. Osy aýdannyń Penjim aýylynda da jańa ambýlatorııa salynyp jatyr. Qurylysqa qajetti qarjy «Jumyspen qamtýdyń jol kartasy-2020» baǵdarlamasy aıasynda bólingen. 7 myń turǵyny bar aýylda buǵan deıin emdeý mekemesi bolmaǵan. Jurttyń basy aýyryp, baltyry syzdasa, aýdan ortalyǵyna shapqylaıtyn. Endi 50 oryndyq nysan iske qosylsa, turǵyndar densaýlyǵyn saqtaýǵa mańyz berilmek. Ambýlatorııa ǵımaratynyń qurylysyna 259,2 mln teńge qarjy jumsalýda.
«Jumyspen qamtýdyń jol kartasy-2020» baǵdarlamasy aıasyndaǵy aýqymdy jumys Alakól aýdanyna da tán. Bıyl aýdany boıynsha baǵarlamaǵa 57 joba kirgen bolatyn. Jospar boıynsha 603 adamdy jumyspen qamtý kózdelse, suranystyń ósýine oraı 56 jobaǵa 612 adam tartylypty. Jol kartasynyń ıgiligi arqasynda aýdandaǵy 32 áleýmettik nysan, 15 kóshe, 3 turǵyn úı-kommýnaldyq nysan jóndelip, jańǵyrtylsa, aýyldardy kógaldandyrý men abattandyrý boıynsha da 7 joba júzege asqan eken. Bulardyń qatarynda Úshbulaq aýylyndaǵy mádenıet úıi men mekteptiń kúrdeli jóndeýden ótýine erekshe toqtalýǵa bolady. Aýyldaǵy bilim ordasynda atqarylǵan kúrdeli jumystarǵa barlyǵy 601 mln 890 myń teńge jumsalyp, 170 adam jumyspen qamtyldy. Olardyń 86-sy osy baǵdarlama negizinde eńbekpen qamtyldy. Al mádenıet oshaǵynyń jóndeý jumystaryna 350 mln 620 myń teńge qarastyrylyp, 180 adam jumysqa tartylǵan eken.
Al Qarasaı aýdanynda «Jumyspen qamtýdyń jol kartasy-2020» baǵdarlamasy boıynsha 62 nysanǵa qurylys jáne jóndeý jumystary júrgizilýde. Osy maqsattarǵa 10 763 930 teńge bólingen. Nátıjesinde 1 880 jumys ornynyń ashylýyna múmkindik týdy. Onyń ishinde jumyspen qamtý ortalyǵy arqyly 940 adamdy eńbekpen qamtý josparlanǵan eken. Qazir Qaskeleń qalasynda 1 500 oryndyq orta mektep qurylysy bastalyp, oǵan 4,5 mlrd teńge qarjy bólingen. Al Raıymbek aýylyndaǵy K.Ázirbaev orta mektebiniń kúrdeli jóndeý jumystary aıaqtalǵan. Jalpy, bıyl aýdan boıynsha 7 mekteptiń ájethanasyn ǵımarat ishine ornatý jumysy aıaqtalady, buǵan 35 mln teńge jumsalýda. Sondaı-aq jol kartasy aıasynda Bereke aýylynyń mádenıet úıiniń kúrdeli jóndeý jumystaryna 726 mln 297 myń teńge qarajat bólinse, Irgeli aýylyndaǵy dárigerlik ambýlatorııa qurylysyna 467 mln teńgeden asa qarjy qarastyrylypty.
Almaty oblysy
