Búgingi kúnde oblystyq tótenshe jaǵdaılar departamenti (TJD) turǵyndardy qorǵaý maqsatynda arnaıy jospar ázirlep, taıaýda ony jarııa etti. Qujatqa sáıkes, oblystaǵy 714 shaqyrym qashyqtyqty quraıtyn joldaǵy qar jıi alyp qalatyn 525 ýchaske kúsheıtilgen baqylaýǵa alynatyn bolady. Sondaı-aq qar qursaýynda qalǵan adamdar úshin jylynatyn 28 bekettiń jumysy uıymdastyrylady. «Jalpy, qys kezeńinde osy jáne basqa da qutqarý jumystaryn uıymdastyrýǵa 3070 adam men 1200 tehnıka birligi jumyldyrylatyn bolady», dep málimdedi oblystyq TJD basshysynyń mindetin atqarýshy Murat Qatpanov.
Qazirgi ýaqytta oblystyq TJD qys kezinde qutqarý jumystaryn irkilissiz júzege asyrýǵa jaramdy tehnıkamen birshama táýir qamtamasyz etilgen. Mysaly, qutqarýshylardyń garajynda omby qardy, qatty borandy eleń qylmaıtyn 87 birlik júrisi ónimdi jáne ınjenerlik tehnıka daıyn tur. Bul tehnıka túrleri kóbine qar qalyń túsetin Temirtaý, Osakarovka, Molodejnyı, Aqsý-Aıýly, Atasý óńirleri baǵytynda shoǵyrlanǵan.
Jalpy, qys kezinde adamdardyń da qaýipsizdik sharalaryna mán berip, saq júrgeni abzal. Jasyratyny joq, keıbir aǵaıyn aýa raıynyń qolaısyz ekenin kúni buryn bilgenimen bitpeıtin sharýasyn syltaý etip, jolǵa shyǵyp ketedi. Sóıtip olar ózderin ǵana emes, qutqarýshylardy da áýre-sarsańǵa salyp qoıady.
Budan bólek muz juqa kezde sý qoımalary men ózenderge jáne kólderge balyq aýlaýǵa jaıaý-jalpylap, kólikpen shyǵyp ketetin jurt ta az emes. Mundaı kezde oıyn balasyn da baqylaýsyz qaldyrmaǵan jón.
Sonymen qatar kún sýytqanda turǵyndardyń ot jaǵyp, elektr jylytqyshtardy qoldanatyny belgili. Dál osyndaı kezde qaýipsizdik sharalaryna óte qatty mán berip, saq bolǵan jón. Máselen, oblysta jylytý maýsymy bastalǵannan beri jekemenshik turǵyn úı sektorynda 166 órt oqıǵasy tirkelgen. Tilsiz jaý bes adamnyń ómirin jalmady.
Taıaýda ǵana Qaraǵandy qalasyndaǵy kópqabatty úılerdiń birinde bolǵan órt tilsiz jaýdyń saqtyq sharalaryn saqtamasa qanshalyqty qaýipti ekenin kórsetti. Sol tótenshe oqıǵa kezinde bir otbasynyń úsh birdeı múshesi jalyn qushaǵynda qalyp, kóz jumdy. Arasynda jasqa tolmaǵan sábı de boldy. Keıin belgili bolǵandaı, atalǵan páterdegi órttiń shyǵýyna elektr jylytqysh sebepshi bolǵan eken.
Búgingi kúnde oblysta peshpen jylytylatyn jer úılerde turatyn azamattardyń ómirin qaýipsiz etý úshin qutqarýshylar tarapynan birshama sharýalar atqarylyp ta jatyr. Mysaly, 2020 jyldyń tamyz aıynan beri kópbalaly, áleýmettik jaǵynan az qamtylǵan otbasylardyń úılerine jergilikti atqarýshy bılik pen úkimettik emes uıymdardyń kómegimen 230 avtonomdy dabyl qaqqysh ornatylǵan.
Qaraǵandy oblysy
