Mınıstr ótken jylǵy parlamenttik tyńdaýda berilgen 19 senatordyń 10 usynysyn oryndaǵanyn atap ótti. Taǵy 9-y iske asyrýdyń uzaq merzimdi sıpatyna baılanysty oryndalýda.
Usynymdar blogynyń biri transshekaralyq yntymaqtastyqqa qatysty boldy.
«Sý dıplomatııasy qajet ekenin túsine otyryp, bul baǵyttaǵy jumys kúsheıtildi», - dedi M.Myrzaǵalıev Úkimet saǵatynda.
Qazaqstannyń segiz sý sharýashylyǵy basseıniniń jeteýi –transshekaralyq, sonyń saldarynan Qazaqstan edáýir dárejede shektes elderdiń: Qytaı, Qyrǵyzstan, О́zbekstan jáne Reseı Federasııasynyń sý sharýashylyǵy saıasatyna baılanysty.
QHR-men sý qatynastarynda búgingi tańda transshekaralyq ózenderdiń sý resýrstaryn bólý jónindegi kelisimniń bolmaýy negizgi problema bolyp tabylady.
Mınıstrdiń málimetinshe, kelisim boıynsha jumys 2015 jyldan bastaldy. Búgingi tańda kirispeden jáne 31 baptan turatyn biryńǵaı qurylym kelisildi.
«QHR-men kelissózder óte kúrdeli. Qytaı shekara mańyndaǵy eshbir elmen sý bólý jóninde kelissózder júrgizbeıtinin erekshe atap ótkim keledi. Qazaqstan QHR kelissózder júrgizip jatqan alǵashqy jáne jalǵyz el», - dep atap ótti M.Myrzaǵalıev.
Sonymen qatar, Ekologııa mınıstrliginiń basshysy aǵymdaǵy jyly Toqtoǵul sý qoımasynan 330 mln.m3 kóleminde qosymsha sý aǵyzýdy qamtamasyz etý úshin elektr energııasymen taýar almasýdy júzege asyrý boıynsha qyrǵyz tarapymen jeke hattamaǵa qol qoıylǵanyn habarlady. Sondaı-aq, Qazaqstan, О́zbekstan jáne Tájikstan arasynda Bakrı Tochık sý qoımasynyń jumys tártibi jáne Dostyq kanaly arqyly sý berý týraly úshjaqty hattamaǵa qol qoıyldy. «Qabyldanǵan sharalardyń arqasynda vegetasııalyq kezeńde Túrkistan oblysynyń Jetisý jáne Maqtaaral aýdandarynyń sýarmaly sýǵa qajettiligi tolyq kólemde qanaǵattandyryldy», - dedi mınıstr.
Sondaı-aq, mınıstrdiń aıtýynsha, О́zbekstanmen aıtarlyqtaı jumys júrgizildi.
Osy jyldyń jazynda sý qatynastary salasyndaǵy yntymaqtastyq máseleleri boıynsha problemalyq máselelerdiń barlyq spektrin qamtıtyn, olardy sheshý merzimderin belgileı otyryp, Jol kartasyna qol qoıyldy. Qol qoıylǵan Jol kartasy sheńberinde 1991 jyldan keıin salynǵan jáne qaıta jańartylǵan sý sharýashylyǵy qurylystaryn birlesip tekserý júrgizildi. Bul buryn sý balansynda eskerilmegen sý qoımalaryn anyqtaý úshin jasaldy.
Sondaı-aq transshekaralyq sý obektilerin birlesip basqarý, paıdalaný jáne qorǵaý týraly kelisim jobasy ázirlendi. Búgingi tańda taraptar kelisim mátinin 80%-ǵa maquldady. «Kelissózder prosesi jalǵasýda. Kelisimge sátti qol qoıý bolashaqta О́zbekstan aýmaǵynda ornalasqan negizgi sý sharýashylyǵy ýchaskelerinde sý resýrstaryn bólýdiń ashyqtyǵyn qamtamasyz etýge múmkindik beredi», - dedi ol.
Qarasha aıynyń sońynda memleketaralyq arnalar arqyly Qazaqstan tarapyna sý berý kestesin saqtamaý máselesin talqylaý úshin qyrǵyz tarapymen kezdesý ótkiziledi.
