Jaqynda Qorǵanys mınıstri avıasııa general-leıtenanty Dáýren Qosanovtyń buıryǵymen osyndaı is-shara ótip, sarbazdardyń 4 myńnan asa týǵan-týysy áskerı bólimderdi aralady. Kelýshilerge qarý-jaraq pen áskerı tehnıka kórmeleri uıymdastyryldy. Oqý-jattyǵý alańdarynda sarbazdar qarýmen saptyq tásilderdi, qoıan-qoltyq urys elementterin jáne oqý-jaýyngerlik tapsyrmalardy oryndaý sheberligin kórsetti.
Tárbıe jumysyn uıymdastyrý, áskerı tártipti saqtaý jóninen qorǵanys vedomstvosy tarapynan qabyldanyp jatqan sharalar týraly jan-jaqty aqparat berildi. Sonymen qatar qarýdy qoldaný, ártúrli sabaqtar men jattyǵýlar ótkizý kezindegi qaýipsizdik qalaı qamtamasyz etiletini egjeı-tegjeı túsindirildi. Ata-analar ashanalarda tamaqtandyrý qalaı uıymdastyrylǵanyn kórip, taǵam rasıonynyń tártibi men alýan túrliligin baǵalady.
Osylaısha, Qorǵanys mınıstrliginiń bul bastamasy merzimdi áskerı qyzmetshilerdiń týǵan-týystaryna jaýyngerlik daıyndyqtyń uıymdastyrylýymen, qyzmet jáne turmys jaǵdaılarymen tanysýǵa múmkindik berdi. Qonaqtar kazarmalardy aralap, turmystyq aımaqtardy da kórip shyqty.
Áskerı bólimderdegi alystan at terletip jetken jas qonaqtardy da erekshe atap ótken jón. Máselen, Taraz qalasynan on jastaǵy Alena «Ońtústik» óńirlik qolbasshylyǵyna qarasty baılanys polkinde qyzmet etetin aǵasy Vladımır Romanovqa kelgen. Gvardeısk garnızonyndaǵy tank brıgadasynyń barlaý batalonynda qyzmet etetin Aıbar Kalıfanovtyń úsh jasar inisi Ámire de aǵasyna kelip, áskerı tehnıkalardy qyzyǵa tamashalady.
Elordadaǵy brıgadaǵa Qaraǵandy, Shymkent, Qyzylorda, Qostanaı, Astana qalasynan barlyǵy 170-ten asa ata-ana jınaldy. Olar tırdi, sport zalyn, kitaphanany aralap, jaýyngerler jattyǵatyn taktıkalyq alańda boldy.
Qatardaǵy jaýynger Dıas Bazkenovtiń ákesi Ashat pen týǵan aǵasy Sábıt Bazkenov Qaraǵandy qalasynan arnaıy kelgen. Jaýyngerlik jarystyń jeńimpazy atanǵan Dıas Bazkenovtiń sýreti bólimsheniń qurmet taqtasyna ilingen edi. Sábıt Bazkenovtiń ózi kezinde tájik-aýǵan shekarasynda áskerı boryshyn ótegen. Ol qazirgi áskerdiń jaǵdaıyn kórip, erekshe áser alǵanyn aıtty.
– Bizdiń kezimizdegi áskerı ómirdiń qıyndyǵy az bolǵan joq. Búgingi jastardyń áskerı boryshyn abyroımen ótep júrgenin kórip, kóńilim marqaıdy. Dıas sııaqty tártipti, namysty uldar eldiń qorǵany bolary sózsiz. Jastarǵa aıtarym – Otan aldyndaǵy paryzdy adal atqaryp, áskerı tártipke árdaıym berik bolyńyzdar. Balamyzdyń qyzmet etý jaǵdaıyn óz kózimizben kórdik. Bastysy, barlyq qajetti jaǵdaı jasalǵan, tártip pen talap ta bar. Osynda jınalǵandardyń barlyǵy áskerılermen túski as ishti. Bul qarapaıym ǵana júzdesýde keshe ǵana jasóspirim bolǵan ulymdy senimdi, tártipti, bir-birine qoldaý kórsetýge daıyn naǵyz er-azamattardyń ortasynda júrgenine ishteı rıza boldym. Sondyqtan áskerı bólim qolbasshylyǵyna alǵysymdy aıtamyn, – dedi ol.
Al Aqtaý garnızonynyń áskerı bólimderi 400-den asa qonaqty qabyldady. Áskerı-teńiz kúshteriniń ártekti kemeler dıvızıonynda ata-analar teńiz qyzmetiniń atmosferasyna qanyqty. Olar matrostardyń turmysymen tanysyp, kaıýt-kompanııalar men kambýzdy aralady.
Teńiz jaıaý áskerleri brıgadasynda ata-analardyń qatysýymen sporttyq jarystar uıymdastyryldy. Mańǵystaý oblysy men Aqtaý qalasy boıynsha «Analar júregi» sarbaz analary komıtetiniń tóraǵasy Gúlmıra Janysbaeva jarystyń bastamashysy boldy.
Desanttyq-shabýyldaý áskerleriniń bólimsheleri de 400-den asa qonaqty qarsy aldy. 37-desanttyq-shabýyldaý brıgadasynda qonaqtarǵa parashıýtti qalaı eńserý kerektigi kórsetilip, arnaıy keshende áýe-desanttyq daıyndyq elementteri tanystyryldy.
Is-sharaǵa qatysa almaǵan ata-analar men jaqyndary úshin áskerı bólimderdiń basshylyǵy «Otbasymen beıneqońyraý» arqyly baılanys uıymdastyrdy. Osylaısha, 26363 áskerı bólimi komandıriniń tárbıe jáne ıdeologııalyq jumys jónindegi orynbasary kapıtan Madııar Muhtarov qatardaǵy jaýynger Begmat Myrzabektiń anasy Dúısegúl Aqjigitovamen habarlasyp, tildesti.
Áńgime barysynda anasyna sarbazdyń qyzmettegi jetistikteri týraly aıtty. Ásirese Desanttyq-shabýyldaý áskerleri áskerı qyzmetshileri arasynda ótken qazaqsha kúreste Begmat Myrzabek úshinshi oryndy ıelengenin habarlady. Sondaı-aq ol ulyn laıyqty tárbıelegeni úshin Dúısegúl Aqjigitovaǵa shynaıy rızashylyǵyn bildirdi.
Biryńǵaı ashyq esik kúni ata-analarǵa uldarynyń kásibı komandırlerdiń basshylyǵymen qyzmet atqaryp, jan-jaqty qoldaýǵa ıe bolyp otyrǵanyna kóz jetkizýge múmkindik berdi. Bul is-shara – armııa týraly qalyptasqan stereotıpterdi eńserýge, sondaı-aq sarbazdarǵa degen qamqorlyqtyń Qarýly kúshter úshin sózsiz basymdyq ekenin nyǵaıta túsýge baǵyttalǵan mańyzdy qadam.
