«Medıakratııa» qoǵamdyq birlestiginiń qoldaýymen, «Marhabat» jýrnalynyń jáne Shymkenttegi qalam ustaǵan, ádebıetsúıer, ónersúıer bir shoǵyr jastardyń uıymdastyrýymen ótken «Kún qaıda asyǵady?» atty kesh shymyldyǵy taǵylymdy beınerolıkpen túrilip, aqynnyń óleńderi oqyldy, sózine jazylǵan ánder shyrqaldy. Baǵdarlamanyń negizgi arqaýy «Máńgilikke ózimmen ala ketken, Meniń názik janymdy kim túsiner?» dep jyrlaǵan aqynnyń lırıkalyq óleńderi men ánderi boldy.
Kesh barysynda ashyq mıkrofon jarııalanyp, kórermender óleń oqyp, júrekjardy lebizderin bildirdi. «Ońtústiktegi qalamyn ushtaıyn, talantyn shyńdaıyn degen ádebıetke birtaban jaqyn jastardyń bári derlik kózi tirisinde klassık jazýshy Marhabat Baıǵuttyń tóńiregine shoǵyrlanyp júretin. Endi osy dástúr «Marhabat» jýrnalynyń tóńireginde jalǵasyn tabýǵa tıis, Shymkentte ádebıet pen ónerdi qadirleıtin jastardyń bas qosatyn bir shańyraǵy bolýy kerek degen nıetpen osyndaı bir izgi bastamany qolǵa alǵan jaıymyz bar. О́leńmen ǵumyr keshken aqynnyń bolmysyn asha túsýge dástúrli ánshiler men ádebıetsúıer qaýym, ónerli jastar atsalysyp otyr.
Jyl sońynda «Marhabat» jýrnaly prozalyq, poezııalyq jáne pýblısıstıkalyq baǵyttar boıynsha «Marhabat» jýrnalynyń laýreattaryn» anyqtaıdy. Qorytyndy keshte qazylar sheshimimen laýreat atanǵan qalamgerlerge qarjylaı syılyqtar tabystalady», deıdi aqyn, «Marhabat» jýrnalynyń bas redaktory Sezim Mergenbaı.
Túrkistanda oblystyq «Farab» ámbebap ǵylymı kitaphanasynyń uıymdastyrýymen ótken «Týla, júrek» atty poezııa keshi de kóptiń kóńilinen shyqty. Qazaq poezııasynyń zańǵar tulǵasy, muzbalaq aqyn Muqaǵalı Maqataevtyń 95 jyldyq mereıtoıyna oraı ótken kesh barysynda aqynnyń syrshyl, tereń maǵynaly óleńderi oqyldy. «Bolashaq» kolledjiniń stýdentteri men Ulttyq ulannyń 5574 áskerı bólimi sarbazdary arnaıy daıyndaǵan jyrlaryn mánerlep oqyp, kórermenge erekshe áser syılady. Sonymen qatar ashyq mıkrofon formatynda erkin pikir almasý uıymdastyrylyp, qatysýshylar Muqaǵalı poezııasyndaǵy adam, mahabbat, ómir jáne týǵan jer taqyryptary tóńireginde oı bólisti. Muqaǵalı aqynnyń rýhanı murasyn zamanaýı formatta nasıhattaý jáne jastardyń ádebıetke degen qyzyǵýshylyǵyn arttyrýdy kózdegen «Túngi kitaphana» jobasy aıasynda qolǵa alynǵan poezııa keshiniń sońynda kitaphana dırektory Janat Sádibekqyzy júrekjardy lebizin bildirip, kópshilikke alǵys aıtty.
