Qala bıligi men Sybaılas jemqorlyqqa qarsy is-qımyl departamenti birlese júzege asyrǵan jobanyń basty maqsaty – memlekettik organdardyń azamattarǵa ashyqtyǵy men qoljetimdiligin arttyrý, kedergisiz orta qalyptastyrý.
– Memlekettik qyzmetterdi alý prosesi turǵyndar úshin barynsha jeńildetilgen ári yńǵaıly bolyp otyr. Bul – el Prezıdentiniń "Halyq únine qulaq asatyn memleket" qaǵıdatyna sáıkes keledi. Open space formatynda azamattarǵa eń qajetti memlekettik qyzmetter kórsetilip, keńester beriledi. Ashyq kabınetterde turǵyndardy aýdan ákimderi men onyń orynbasarlary qabyldaıdy. Karantınge baılanysty kezdesýler onlaın formatta ótedi. Qala turǵyndaryn abattandyrý, TKSh, joldar men aýlalardy jóndeý, qoǵamdyq qaýipsizdik, jaryqtandyrý men sýmen jabdyqtaý máseleleri tolǵandyrady, - deıdi Almaty ákiminiń baspasóz hatshysy Áset Muqajanov.
