Ekonomıkanyń, bank salasynyń jaı-kúıi, respýblıkalyq bıýdjettiń atqarylýy, memlekettik satyp alýdaǵy jergilikti qamtý týraly ulttyq ekonomıka mınıstri R.Dálenov, Ulttyq bank tóraǵasy E.Dosaev, qarjy mınıstri E.Jamaýbaev, ónerkásip pen energetıka sektoryndaǵy ahýal týraly ındýstrııa jáne ınfraqurylymdyq damý mınıstri B.Atamqulov jáne energetıka mınıstri N.Noǵaev, agroónerkásiptik keshendegi jaǵdaı týraly aýyl sharýashylyǵy mınıstri S.Omarov, óńirlerdegi ahýal týraly Aqmola oblysynyń ákimi E.Marjyqpaev, Qaraǵandy oblysynyń ákimi J.Qasymbek, Shymkent qalasynyń ákimi M.Áıtenov, Batys Qazaqstan oblysynyń ákimi Ǵ.Esqalıev baıandady.
2020 jyldyń on aıynyń qorytyndysy boıynsha ekonomıkanyń naqty sektory oń ósim qarqynyn kórsetýde. О́ńdeý ónerkásibinde 3,2%-ǵa, onyń ishinde azyq-túlik ónimderi óndirisinde 3,4%-ǵa, farmasevtıkada 39,7%-ǵa, daıyn metall buıymdary óndirisinde 19,5%-ǵa, mashına jasaýda 16,5%-ǵa, onyń ishinde avtomobıl jasaýda 53,6%-ǵa, sondaı-aq qaǵaz óndirisinde 15%-ǵa jáne jeńil ónerkásipte 16,4%-ǵa ósim qamtamasyz etildi.
Qurylys kólemi 10,7%-ǵa, turǵyn úıdi paıdalanýǵa berý 9,7%-ǵa nemese shamamen 10,7 mln sharshy metrge ulǵaıdy. Aýyl sharýashylyǵynda 5,2%-ǵa turaqty ósim qamtamasyz etildi. QR altyn-valıýta rezervteri men Ulttyq qordyń aktıvteri bıylǵy 1 qazanda $91,1 mlrd qurady.
Temir kenin (+1%) jáne ózge de paıdaly qazbalardy (+0,7%) óndirý sekildi taý-ken sektorynyń mańyzdy baǵyttary boıynsha oń dınamıka saqtalýda. Bul rette OPEK+ qol jetkizilgen ýaǵdalastyqtardy oryndaý qajettiligi jaǵdaıynda munaı óndirýdiń tómendeýi (-4,3%) baıqalady.
Karantındik sharalardyń bolýy jáne kúsheıtilýi qyzmet kórsetý salasyna áser etýde (-6,1%). Sonymen qatar sektor kórsetkishteri birtindep turaqtanyp keledi.
Aqmola, Túrkistan, Almaty, Jambyl, Qostanaı, Mańǵystaý, Pavlodar, Soltústik Qazaqstan oblystary jáne Shymkent qalasy negizgi 8 kórsetkishtiń 5-i boıynsha áleýmettik-ekonomıkalyq damý ósimin qamtamasyz etti. 4 kórsetkish boıynsha Aqtóbe, Shyǵys Qazaqstan, Qaraǵandy oblystarynda, Nur-Sultan jáne Almaty qalalarynda oń dınamıkaǵa qol jetkizildi.
Úkimet basshysy óńirlerdiń ákimderine áleýmettik-ekonomıkalyq damýdyń josparlanǵan kórsetkishterine qol jetkizý jáne Memleket basshysy alǵa qoıǵan mindetterdi tıimdi iske asyrý úshin barlyq sharalardy qabyldaýdy tapsyrdy.
Premer-Mınıstr respýblıkalyq bıýdjettiń kiris bóligin qamtamasyz etý boıynsha sharalar qabyldaý, sondaı-aq memlekettik organdar men ákimdikterdiń jyl sońyna deıin bıýdjet qarajatyn tolyq ári tıimdi ıgerýi qajettigine nazar aýdardy.
