Qarashanyń alǵashqy on kúndigi «Bala Sheldon», «Jaqsy dáriger» sekildi tanymal jobalardyń kezekti maýsymymen qatar Chak Lorıdiń jańa sıtkomy, muǵalim men oqýshynyń romany týraly drama jáne ózge de jańa serıaldarmen qýantqan edi. Netflix, «Kınopoısk HD», «Amedıateka» syndy alyp ınternet-kınoteatrlar bul joly da qoǵamdyq qatynastardy jańǵyrtýdy maqsat etken birqatar serıaldardy kórsetkeli otyr.
«Táj» (The Crown), 4-shyǵarylym, tusaýkeseri 15 qarashada, Netflix arnasynda
II Elızaveta patshaıymnyń ómirbaıandyq tarıhnamasy anaý aıtqandaı oza shappasa da, dızaın kórkemdigi men tegeýrindi tasqynymen tańǵaldyrdy. Dramatýrg Pıter Morgan ondaǵan saǵattyq serııanyń tórtinshi maýsymyn jalǵyz ózi jazyp jatyr, al ekranda HH ǵasyrdyń tańǵajaıyp tulǵalaryn beıneleıtin juldyzdardyń baǵy asyp tur. Bul jolǵy tórtinshi shyǵarylymǵa patshaıym rólindegi Olıvııa Koýlman, Margaret hanshaıymdy oınaǵan Helena Bonham Karter, Margaret Tetcherdiń rólin somdaıtyn ańyz Djıllıan Anderson men Dıana hanym bolyp qaıta ómirge kelgen juldyz Emma Korrın kelip qosyldy.
«Aı bazasy 8» (Moonbase 8), tusaýkeseri 8 qarashada, «Amedıateka» arnasynda
A24 kompanııasynyń únemi joly bola bermeıtin beıbaq ǵaryshkerlerdiń aıǵa ushar aldyndaǵy NASA bazasyndaǵy jattyǵýlary jaıyn baıandaıdy. Fılmniń komedııa ansambli Fred Armısen, Djon S. Raılı jáne Tım Heıdkerden quralǵan. Naǵyz kúzgi kóńil kúıge arnalǵan komedııa ekeni sózsiz.
«Jalǵa berý» (The Rental), tusaýkeseri 12 qarashada, IVI platformasynda
Aǵaıynda qos jigit (tele juldyzdar Den Stıvens pen Tobı Gýss) apta sońynda demalýdy uıǵarady. Jarqabaq basyndaǵy bıikte ornalasqan úıdiń tóńiregi kóz qýantarlyq ádemi. Tek olardy qarsy alǵan adamnyń sıqy óte kúmándi edi. Aqyry demalýǵa kelgen jigitter kóńilderi kúpti bolsa da, aqshasyn tólep, úıge ornalasady. Fılmniń ári qaraıǵy shıelenisti jelisi kimdi bolsyn qyzyqtyrmaı qoımasy anyq.
Úlken aspan (The Big Sky), tusaýkeseri 17 qarashada, ABC arnasy
ABC arnasynyń dramasy jeke detektıv pen burynǵy polıseıdiń birlesip, joǵalyp ketken apaly-sińlili qyzdardy izdeý oqıǵasyn baıan etedi. Olardy trassa boıynda júk kóliginiń júrgizýshisi ustap alyp ketken. Tergeý barysynda buryn da osy aımaqta qyzdar urlanǵany belgili bolady. Eki tergeýshiniń maqsaty – kezekti qaıǵyly jaǵdaı bolmaı turǵanda manıaktyń aıaǵyna tusaý salý.
«Kıt aýlaýshy», tusaýkeseri 21 qarashada, «Kınopoısk HD» arnasynda
Chýkotkada jergilikti turǵyndarmen birge túsirilgen fılm on jyl boıy oılastyrylǵan edi. «Kıt aýlaýshy» – bul bozbala Leshka men onyń jaqyn dosy Kolıannyń erjetýi jaıyndaǵy rýhanı drama. Ekeýi de Berıng buǵazyndaǵy kishkentaı kıt aýlaıtyn aýylda turady. Reseıdiń soltústik-shyǵysyndaǵy Anadyr qalasyna jetý ońaı emes. Al qaıyqpen aınaldyrǵan bir saǵatta jetip barýǵa bolady. Aýylda oıyn-saýyq joq dese de bolady, kúndegi tirlik kıt aýlaýdan bastalady. Odan qalsa kósheniń ana basynan myna basyna júre berý de jalyqtyrady. Jýyrda qosylǵan ınternet baılanysy nashar, áıtse de til bilmeıtin, órkenıetten jyraq jatqan aýyldyń balalary ózge keńistikke, jańalyqqa qushtar edi. Rejısser Fılıpp Iýrevtiń atalǵan fılmi bıyl Venesııa kınofestıvalinde júldeger atandy.
Kezekti maýsymmen shyqqan serıaldar qatary biz joǵaryda toptastyrǵan fılmder qatarymen shektelmeıdi. Talǵampaz kórermenniń tańdaýynan shyǵarlyq jańa týyndylar sát saıyn úlken ekranǵa joldanyp jatyr. Strımıng platformalardaǵy kontenttiń múmkindikteri men keleshegi sheteldik naryq tarapynan qyzyǵýshylyq týdyryp keledi. Máselen, jalpy sany 242 bólimnen turatyn serıal men anımasııalyq joba TMD-daǵy eń úzdik onlaın-kınoteatr sanalatyn IVI.RU platformasy arqyly taralmaq.
Sonymen qatar Ulttyq arna Táýelsizdiktiń 30 jyldyǵyna arnalǵan 100 bólimnen turatyn «Zamandastar», Halyq jazýshysy Á.Nurshaıyqovtyń romany jelisi boıynsha túsirilgen «Mahabbat, qyzyq mol jyldar» telehıkaıalaryn usynbaq.
Zamanaýı serıaldar – minez-qulyq úlgileri men emosııalyq reaksııalar jıyntyǵyn toǵystyratyn búgingi zamannyń eń mańyzdy mádenı alańyna aınaldy. Teleshoýlar men serıaldar kóteretin júgi, mazmundy sapasy turǵysynan romanǵa para-par kelip jatady. Búgingi qala turǵynynyń kún tártibine óte yńǵaıly taraýlarǵa bólingen serıaldar kúndelikti ómir yrǵaǵyna saı keledi. О́ıtkeni aqparatqa shekten tys qanyqqan adamdar kúni boıǵy qarbalastan qoly qalt ete qalǵanda, tom-tom kitaptardyń betin ashýy ekitalaı. Sondyqtan yńǵaıly áńgime taqyrybyna aınalǵan teleshoýlar, serıaldar, fılmder belgili bir taqyryp aıasynda mádenı orta qalyptastyryp otyrǵany shyndyq.
