Bul qanatqaqty joba bolǵandyqtan, "EkoSergekter" aldaǵy eki-úsh aıda Almaty mańyndaǵy barlyq ulttyq parkte ornatylady.
"Aldymen Ile-Alataý ulttyq parkinde 30 "EkoSergek" ornatýdy josparlap otyrmyz. Olar týrıster kóp júretin jerlerde paıda bolady. Mysaly, ÚAK, Esik, Túrgen aýdandarynda. Sondaı-aq, Kólsaı men Qaıyńdy kólderinde", dedi Ekologııa mınıstrliginiń baspasóz hatshysy Samal Ibraeva.
Onyń aıtýynsha, "EkoSergekter" ınspektorlarǵa aıtarlyqtaı kómektesedi.
"Sońǵy ýaqytta ulttyq saıabaqtarda qoqysqa baılanysty qıyndyqtar týyndady, órtter men vandalızm jıilep ketti. Sondyqtan kameralardy ornatý týraly sheshim qabyldandy. Birinshiden, bul týrısterdi tártipke keltiredi. Ekinshiden, kameralar órt týraly sıgnal beredi jáne ekologııalyq beketterdiń jumysyn baqylaýǵa múmkindik beredi. Ulttyq parkterde Qyzyl kitapqa engen janýarlar da ómir súredi. Biz "EkoSergekter" brakonerlermen kúreste kómektesedi degen úmittemiz", dedi ol.
Baspasóz hatshysy mınıstrlik ulttyq saıabaqtarda qoqys tastaǵan adamdarǵa aıyppuldardy kóbeıtýdi josparlap otyrǵanyn da aıtty. Qazir osy úshin 10 AEK (27 780 teńge) tólenedi.
Odan bólek, Esik kóline kirý shekteldi.
"2019 jyly Almaty ákimdigi kól mańyndaǵy aýmaqty "Qazlektroenergııa" kompanııasyna senimgerlik basqarýǵa bergen. Kúzden bastap bul kompanııa kóldi saqtaý úshin shekteý sharalaryn engizdi. Arnaıy turaq bar, kólik uıymdastyrylǵan, adamdar jaıaý da bara alady", dedi Ile-Alataý ulttyq parki bas dırektorynyń orynbasary Tilek Ádiljanov.
