Eske salaıyq, Memleket basshysy bıylǵy 13 qarashada memlekettik qyzmet salasyndaǵy keıbir aktige ózgerister engizýdi kózdeıtin Jarlyqqa qol qoıdy.
"Osylaısha, elimizde saıası qyzmetkerlerdi rotasııalaý ınstıtýty alǵash ret engizildi (buryn rotasııa ákimshilik qyzmetkerlerge ǵana qoldanylǵan). Endi saıası qyzmetkerler atqaratyn laýazymyna taǵaıyndalǵan kúnnen bastap árbir tórt jyl saıyn rotasııalanatyn bolady", dep habarlaıdy vedomstvo ókili.
Tıisti memlekettik organ basshysynyń sheshimi boıynsha saıası qyzmetshiniń atqaratyn laýazymynda bolý merzimi eki jylǵa uzartylýy múmkin. Keıinnen eki jylǵa uzartý Prezıdent janyndaǵy Kadr saıasaty jónindegi ulttyq komıssııanyń sheshimi boıynsha ǵana múmkin bolady.
"Saıası qyzmetkerlerdiń laýazymda bolýynyń ruqsat etilgen eń uzaq merzimi segiz jyldan aspaıdy. Saıası qyzmetkerlerdi rotasııalaý ınstıtýty 2021 jylǵy 1 qańtardan bastap engiziledi", delingen habarlamada.
Sondaı-aq osy Jarlyqpen "B" korpýsynyń qyzmetkerlerin rotasııalaý tártibine tolyqtyrýlar engizildi. Máselen, ákimdikter basqarmalarynyń basshylaryna óńiraralyq rotasııalaý engizildi (buryn olardy rotasııalaý tek bir ákimdik sheginde ǵana múmkin bolatyn). Bul rette mundaı rotasııa ákimdikterde komandalyq oryn aýystyrýǵa jol bermeý maqsatynda Agenttikpen kelisim boıynsha júrgiziledi.
Budan bólek, sońǵy úsh jyldan kem emes belgili bir basshylyq laýazymdardy atqaratyn, onyń ishinde ártúrli memlekettik organda jumys isteıtin "B" korpýsynyń qyzmetkerlerin erikti rotasııalaý engizildi. Mundaı rotasııa basqa ákimshilik-aýmaqtyq birlikke ǵana múmkin bolady.
Zeınetkerlik jasqa tolǵanǵa deıin úsh jáne odan az jyl qalǵan qyzmetkerlerge rotasııadan bas tartý quqyǵy berilgenin atap ótken jón.
"Rotasııanyń negizgi maqsattary memlekettik organdar qyzmetiniń tıimdiligin arttyrý, sybaılas jemqorlyq quqyq buzýshylyqtardyń aldyn alý, sondaı-aq qyzmetshilerdiń kásibı áleýeti men basqarýshylyq tájirıbesin damytý jáne tıimdi paıdalaný bolyp tabylady", dedi Memlekettik qyzmet isteri agenttigi.
Osy Jarlyqpen "B" korpýsynyń qyzmetkerlerin memlekettik organdardyń ishinde aýysý tártibimen taǵaıyndaý múmkindigi engizildi. Sonymen memlekettik qyzmetkerler memlekettik organ ishindegi ózge de teń dárejeli laýazymǵa, sondaı-aq joǵary turǵan laýazymǵa osy memlekettik organda keminde sońǵy eki jyl tómen turǵan laýazymda ótili bolǵan jaǵdaıda aýysý tártibimen taǵaıyndalýy múmkin.
Bul ózgeris memlekettik qyzmetshilerdiń memlekettik organdar ishinde mansaptyq ilgerileýine yqpal etedi.
