Geologııalyq barlaý jobasyn iske asyrýdyń boljamdy merzimi – 6 jyl, birinshi kezeńde barlyq geologııalyq barlaýdy qarjylandyrýdy "Discovery Ventures Kazakhstan" JShS qamtamasyz etetin bolady. Kelisimsharttyq ýchaskelerdiń jalpy aýdany shamamen 1500 km2 quraıdy. Operatorlyq kelisimde altyn, mys, myrysh jáne ilespe metaldardy barlaý qarastyrylǵan.
"Qazir otandyq mıneraldyq-shıkizat bazasynyń udaıy óndiris qarqynynyń aıtarlyqtaı tómendeýi óte mańyzdy másele bolyp otyr. Qazaqstanda orta merzimdi keleshekte jańa ken oryndarynyń bolmaýy taý-ken salasynyń quldyraýyna ákelýi múmkin. Táýekeldiń joǵary dárejesine qaramastan, biz geologııalyq barlaý jobalaryna kirý týraly sheshim qabyldadyq. Bul álemdik úrdis, kóptegen iri kompanııalar qazir osy jolmen júrýde", dep atap ótti "Taỳ-Ken Samuryq" Ulttyq taỳ-ken kompanıasy" AQ Basqarma Tóraǵasy Qanat Qudaıbergen.
Kompanııalardyń derekteri boıynsha, birinshi jyl ishinde olar tarıhı derekterdi jınaý jáne túsindirýmen, geofızıkalyq zertteýlermen jáne geologııalyq kartalaýmen aınalysatyn bolady. Lısenzııalyq aýmaq boıynsha aýqymdy aeromagnıttik túsirilim júrgizý josparlanýda. Sodan keıin geofızıkalyq zertteýlerdiń derekteri keıingi jyldarǵa qajetti geologııalyq barlaý jumystarynyń kólemin anyqtaý úshin jan-jaqty taldanady.
Esterińizge sala keteıik, "Taỳ-Ken Samuryq" AQ ıýnıorlardy qoldaý baǵdarlamasyn júzege asyrýda. Geologııalyq barlaýǵa baǵdarlanǵan ıýnıorlyq kompanııalarǵa "Taỳ-Ken Samuryq" bir tereze qaǵıdaty boıynsha jan-jaqty járdem usynady. Másele taý-ken sektoryn damytýdy yntalandyrý jáne mıneraldyq-shıkizat bazasyn molaıtý jónindegi mindetter sheńberinde qarjylyq, saraptamalyq, marketıngtik jáne memlekettik qoldaý týraly bolyp otyr.
