Qazaqstandyqtar Elektrondy eńbek bırjasyndaǵy (EEB) «jeke kabınetinde» jumys izdep júrgen adam retinde esepke tura alady, memleket sýbsıdııalaıtyn bos jumys oryndaryn óz betinshe tańdaı alady jáne kóptegen qyzmetke qol jetkizedi. Atalǵan qyzmetterdi onlaın-rejimde alý úshin elektrondy sıfrly qoltańbany paıdalana otyryp, EEB-da tirkelý qajet.
«Elektrondy eńbek bırjasyndaǵy qanatqaqty joba jumyssyzdardy tirkeý rásimderin jeńildetý jáne jumyspen qamtýdy qoldaý boıynsha memlekettik qyzmetterdi, onyń ishinde jumysynan aıyrylý boıynsha áleýmettik tólemderdi alýdy jeńildetý úshin iske qosyldy. Endi barlyǵyn tek ınternet, kompıýter jáne elektrondy sıfrly qoltańbanyń kómegimen jasaýǵa bolady», deıdi «Eńbek resýrstaryn damytý ortalyǵy» AQ prezıdenti Dáýlet Arǵyndyqov.
Internet nemese kompıýter bolmaǵan jaǵdaıda qyzmetterdi halyqty jumyspen qamtý ortalyǵynda ózine-ózi qyzmet kórsetý aımaǵyn paıdalana otyryp alýǵa bolady. Bul azamattarǵa HJQO mamanyna qabyldaýǵa kezek kútpeýge jáne COVID-19 indeti jaǵdaıynda fızıkalyq baılanystardy azaıtýǵa múmkindik beredi.
«Qyzmet tolyqtaı avtomattandyrylǵan. Bul degenimiz, eger portal úsh jumys kúni ishinde adamǵa laıyqty jumys taba almasa, onda Elektrondy eńbek bırjasy jumyssyz retinde avtomatty túrde tirkeıdi. Osylaısha, adam faktory tolyǵymen alynyp tastalady», deıdi D.Arǵyndyqov.
«Jeke kabınette» qazaqstandyqtar ózderiniń tirkelý kezeńderin qadaǵalaı alady. Jumyssyz mártebesin alǵannan keıin azamattar onlaın-rejimde EEB-da jumysynan aıyrylý boıynsha áleýmettik tólemge ótinim bere alady jáne memleket sýbsıdııalaıtyn jumys oryndaryn – jastar praktıkasynda, áleýmettik jumys oryndarynda, qoǵamdyq jumystarda bos jumys oryndaryn óz betinshe tańdaı alady.
Jumys izdep júrgen adam jumyssyz retinde tirkeý, memleket sýbsıdııalaıtyn jumys oryndaryna jiberý, jumysynan aıyrylý boıynsha áleýmettik tólem alý boıynsha qyzmet kórsetý týraly tolyǵyraq EEB portalynan nemese halyqty jumyspen qamtý ortalyǵynan bilýge bolady.
