Bes jylǵa temir torǵa toǵytylǵan tártip saqshysy, «polısııa maıory» sheninen de qaǵyldy. Atalǵan qylmystyq is Almaty qalasy, Medeý aýdanyna qarasty №2 sotynda qaralǵan bolatyn. Quzyrly orynnyń baspasóz qyzmeti habarlaǵandaı «kúdikti QR QK-niń 190-baby 3-bóliginiń 1-tarmaǵymen, 28-babynyń 4-bóligimen, 367-babynyń 2-bóligimen aıypty dep tanylyp, 5 jylǵa bas bostandyǵynan aıyryldy».
Is materıaldaryna sáıkes, 2011 jyly polısııa qyzmetkeri polısııanyń aýyldyq bólimin basqara otyryp, Almaty oblysynda jer alyp berýge kómekteskeni úshin 8 myń AQSh dollaryn alǵan. 2014 jyly ol basqarma basshysynyń orynbasary bolyp turǵan tusta boryshkerdi izdeý jeleýimen taǵy bir adamnan «Mersedes Benz E-280» markaly kóligin jáne 5 myń AQSh dollaryn alypty. Sonymen qatar 2020 jyly polısııanyń ýákiletti tulǵasy bola tura, qylmystyq is jasaǵan adamǵa bultartpaý sharasyn aıqyndaý kezinde jáne jazany jumsartýǵa kómekteskeni úshin 7 myń AQSh dollary men 150 myń teńge para berýge májbúrlegen.
Mundaı jaǵdaılar qoǵamnyń polısııaǵa degen senimin seıilte beretini sózsiz. Ishki ister mınıstrligi júrgizip jatqan reformalar aıasynda tájirıbeli ári adal kásibı mamandardy saqtap qalýdyń keshendi sharalaryn qarastyrý kerek-aq. Sonymen birge jas kásibı mamandardy irikteý barysynda olardyń sybaılas jemqorlyqqa qarsy ımmýnıtetin tekserý máselesi de basa nazar aýdarýdy qajet etetindeı.
ALMATY
