Dálirek aıtsaq, qos kompanııa Jambyl, Qaraǵandy jáne Shyǵys Qazaqstan oblystarynyń aýmaǵyn barlap kórmek. Olar jobany iske asyrýǵa 6 jyldy arnamaq. Birinshi kezeńdegi barlyq geologııalyq barlaýdy «Discovery Ventures Kazakhstan» JShS qarjylandyrady. Kelisimsharttyq ýchaskelerdiń jalpy aýdany shamamen 1 500 sharshy shaqyrymǵa teń. Operatorlyq kelisimde altyn, mys, myrysh jáne ilespe metaldardy barlaý qarastyrylǵan.
– Qazir otandyq mıneraldy shıkizat bazasynyń óndiris qarqyny aıtarlyqtaı tómendeýde. Bul óte mańyzdy máselege aınalyp otyr. Qazaqstanda orta merzimdi keleshekte jańa ken oryndarynyń bolmaýy ken baıytý salasynyń quldyraýyna alyp kelýi múmkin. Táýekeldiń joǵarylyǵyna qaramastan, biz geologııalyq barlaý jobalaryn bastaý týraly sheshim qabyldadyq. Bul álemdik úrdis. Kóptegen iri kompanııalar qazir dál osy jolmen júrip keledi, – dedi «Taý-ken Samuryq» ulttyq taý-ken kompanııasy» AQ Basqarma tóraǵasy Qanat Qudaıbergen.
Kompanııa ókilderiniń habarlaýynsha, barlaýdyń alǵashqy jylynda tarıhı derekterdi jınaý jáne túsindirýmen, geofızıkalyq zertteýlermen jáne geologııalyq kartalaýmen aınalyspaq. Budan bólek lısenzııalyq aýmaq boıynsha aýqymdy aeromagnıttik túsirilim júrgizý josparlanýda. Sodan keıin geofızıkalyq zertteýlerdiń derekteri keıingi jyldarǵa qajetti geologııalyq barlaý jumystarynyń kólemin anyqtaý úshin jan-jaqty taldanatyn bolady.
Eske sala keteıik, «Discovery Ventures Kazakhstan» JShS – ıýnıorlyq kompanııa. Tarqata aıtsaq, bul – damýdyń bastapqy satysyndaǵy jobalarǵa baǵdarlanǵan shaǵyn kompanııa. Osy oraıda «Taý-ken Samuryq» ulttyq taý-ken kompanııasy» AQ ıýnıorlyq kompanııalardy qoldaý baǵdarlamasyn júzege asyrýda. Geologııalyq barlaýǵa baǵdarlanǵan mundaı kompanııalarǵa aksıonerlik qoǵam «bir tereze» qaǵıdaty boıynsha jan-jaqty járdem usynady. Ondaǵy maqsat – taý-ken sektoryn damytýdy yntalandyrý jáne mıneraldyq-shıkizat bazasyn molaıtý mindetteri sheńberinde qarjylyq, saraptamalyq, marketıngtik jáne memlekettik qoldaý.
