Altyn kúnniń astynda ortaq múdde jolyna uıysyp, qaımaǵy buzylmaǵan qadirli jurtymyz orda tikken otyz jyldy ótkerip, bolashaqqa batyl bet alyp barady. Joǵalǵanymyz tabylyp, óshkenimiz janyp, kem-ketigimiz tolysyp, ulttyq qundylyqtar ulyqtalýda. Tanystyrylymnyń tıek aǵytar sózi osylaı bastaldy. Til saıasaty komıtetiniń tóraǵasy Ádilbek Qaba shara mańyzyna toqtaldy: «Memleket basshysynyń uly Abaıdyń 175 jyldyǵyn joǵary deńgeıde merekeleý týraly arnaıy Jarlyǵy halqymyzdyń tarıhı jady men rýhanı ómirine sony serpilis ákelgen tarıhı oqıǵa boldy. Qazaqstan Respýblıkasy Mádenıet jáne sport mınıstrligi tarapynan osy baǵytta qolǵa alǵan sharýanyń shoqtyǵy bıigi – osy «Abaı ınstıtýty» ashyq bilim berý jobasy. Bul sharanyń qaınar kózi «Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasynan» bastaý alady. Qazirgi tańda «Otandastar» qorymen birlesip, bes memlekette: Túrkııa, Iran, Reseı, Belgııa jáne AQSh elderinde qazaq tilin oqytý kýrstaryn bastadyq».
Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy dırektorynyń orynbasary Aıdos Ábdihalyq portal týraly jan-jaqty áńgimelep berse, jazýshy, fılologııa ǵylymdarynyń doktory, abaıtanýshy Tursyn Jurtbaı iske qosylyp jatqan jobadan úlken úmit kútetinin jasyrmady.
«Bizdiń býyn balanyń oıyny dep sanap kelgen ǵalamtor búginde zaman tili retinde tanylyp, tipti memleketterdiń saıasatyn aıqyndap beretin qural deńgeıine kóterildi. Sondyqtan qazaq tilin bilgisi keletin sheteldikterge bul joba úlken kómek bolady dep oılaımyn. О́z basym osyndaı eýropalyqtarǵa kýá bolyp, Qytaı ǵalymynyń Abaı qarasóziniń aýdarmasyna: «Muny neǵyp buryn bilmegenmin», – dep tańǵalǵanyn kórdim. Endi kórkemdik deńgeıin kóterip, osy portalǵa jarııalasa, qanshalyqty kómek bolar edi», dedi ol.
Qazaqstan Respýblıkasy Syrtqy Ister mınıstrligi dıasporalarmen jumys jónindegi basqarma basshysy Muqtar Káribaı, Qazaqstan Respýblıkasy Aqparat jáne qoǵamdyq damý mınıstrligi «Otandastar qory» prezıdentiniń keńesshisi Dıdar Bolat aqjoltaı tilek bildirdi.
Iske qosylyp otyrǵan www.abai.institute veb-portalynyń jumysy týraly Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy Ádisteme basqarmasynyń basshysy Sofııa Qajyaqparqyzy jan-jaqty túsinik berdi, al «Qazaq tilin oqytýda ınternet resýrstaryn paıdalaný týraly» Iran Islam Respýblıkasyndaǵy qazaq tili oqytýshysy Asqar Qazaq áńgimeledi.
Onlaın sharaǵa shetelderdegi Qazaqstan Respýblıkasy Elshilikteriniń jaýapty mamandary, Túrkııa, Iran, Reseı, Belgııa jáne AQSh elderinde qazaq tilin oqytyp jatqan kýratorlar men Brazılııa, Fransııa, Germanııa, Qytaı, О́zbekstan, Mońǵolııada turyp jatqan baýyrlarymyz qatysty.
Erlan TО́SBAIULY
