Qazaqstan Respýblıkasynda qos azamattyqqa jol berilmeıdi, ıaǵnı shetel azamaty bir mezgilde Qazaqstan Respýblıkasynyń azamaty bola almaıdy. Eger Qazaqstan Respýblıkasynyń azamaty basqa memlekettiń azamattyǵyn alatyn bolsa, onda sol kezden bastap Qazaqstan Respýblıkasynyń azamattyǵy saqtalmaıdy.
– Pavlodar oblysynyń PD Kóshi-qon qyzmeti basqarmasy 2020 jyldyń 10 aıynda 544 adamǵa qatysty Qazaqstan Respýblıkasynyń azamattyǵynan aıyrý boıynsha qujattardy resimdedi, onyń ishinde 454 adam basqa memlekettiń azamattyǵyn alǵany týraly óz betinshe habarlady. Budan basqa 90 adamnyń qos azamattyqpen júrgeni anyqtaldy, – dedi Pavlodar oblysy PD Kóshi-qon qyzmeti basqarmasynyń bastyǵy Arman Ýálıev.
Basqa memlekettiń azamattyǵy bola tura, Qazaqstan Respýblıkasynyń qujattaryn paıdalanǵan 34 azamat anyqtaldy, basqa memlekettiń azamattyǵyn alǵany týraly belgilengen merzimde habarlamaǵany úshin 56 quqyq buzýshy ákimshilik jaýapkershilikke tartyldy.
– Qazaqstan pasportyn tapsyrýǵa sheshim qabyldaǵan azamattardyń negizgi bóligi Reseı azamattyǵyn aldy. Málimdemelerinde adamdar ózderiniń qonys aýdarýyn balalarynyń Reseıde oqýymen nemese qamqorlyqty qajet etetin qart ata-analarynyń sonda turýymen túsindiredi, – dep atap ótti Arman Muratuly.
Mysaly, Reseı Federasııasynyń azamattyǵyn alǵan Ýspen, Sharbaqty jáne Jelezın aýdandarynyń burynǵy turǵyndarynda qos azamattyq faktileri anyqtaldy. Ýspen aýdanynyń turǵyny bıylǵy jyldyń qyrkúıek aıynda Reseı Federasııasynyń azamattyǵyn qabyldap, Reseı pasportyn alyp, zańnamada belgilengen merzimde basqa respýblıkanyń azamattyǵyn qabyldaǵany týraly habarlamaı, qazaqstandyq pasportyn tapsyrmaǵan.
Ýspen aýdandyq sotynyń qaýlysymen azamat QR Ákimshilik quqyq buzýshylyq týraly kodeksiniń 496-baby boıynsha kináli dep tanylyp, oǵan 388 920 teńge kóleminde aıyppul salyndy. Jelezın aýdanynyń turǵyny sot qaýlysymen Qazaqstan Respýblıkasynyń azamattyq týraly zańnamasyn buzǵany úshin elden shyǵaryldy. Ol 2020 jyldyń aqpan aıynda RF azamattyǵyn alyp, óziniń qazaqstandyq pasportyn tapsyrǵan joq.
Tártip buzýshy sottan ony elden shyǵaryp jiberýdi surady, bul sheshimdi aıyppul tóleý úshin aqshasynyń, sondaı-aq týystary men múlkiniń joqtyǵymen túsindirgen.
