Foto: Aqorda
Senim gramotalaryn: Kýveıt Memleketiniń elshisi Adel Ahmed Sýlaıman Ál Gýnaıman, Mońǵolııa elshisi Gýnaajavyn Batjargal, Monako Knıazdiginiń elshisi Mıreı Martını, El-Salvador Respýblıkasynyń elshisi Iýrıı Pavel Santakrýs Perdemo tapsyrdy.
Memleket basshysy dıplomattardy Qazaqstandaǵy mıssııalarynyń resmı túrde bastalýymen quttyqtap, olardyń ekijaqty yntymaqtastyqty damytýǵa eleýli úles qosatynyna senim bildirdi. Sondaı-aq elimizde aýqymdy reformalar iske asyrylyp jatqanyna toqtaldy.
«15 naýryzda jańa, mazmuny jaǵynan progressıvti Konstıtýsııa qabyldaý boıynsha referendým ótti. Biz «Zań men tártip» qaǵıdatyna negizdelgen Ádiletti Qazaqstandy quryp jatyrmyz. Bilim, ınnovasııa jáne jasandy ıntellektini óristetýdi maqsat etken memleket bolýdy kózdeımiz. Bıyl elimizde Sıfrlandyrý jáne jasandy ıntellekt jyly dep jarııalandy. Osy asa mańyzdy salada jetistikke jetý úshin barlyq jaǵdaıdy jasaımyz», dedi Prezıdent.
Qasym-Jomart Toqaev Qazaqstan barlyq eldermen konstrýktıvti ári ózara tıimdi qarym-qatynas ornatýǵa baǵyttalǵan beıbit jáne teńgerimdi syrtqy saıasat júrgizetinin atap ótti.
«Qazaqstanda elderińizdiń múddesine saı keletin múmkindik mol ekenine senimdimin. Kelesi aptanyń jumys kestesi óte tyǵyz bolmaq. Mońǵolııa Prezıdenti saparmen keledi. Astanada BUU aıasynda О́ńirlik ekologııalyq sammıt uıymdastyrylady. Sondaı-aq Halyqaralyq Araldy qutqarý qoryna múshe memleketter basshylary keńesiniń otyrysyn ótkizemiz. Elimizdegi ýaqıǵalardy muqııat saralap, ózara yntymaqtastyqty nyǵaıtýǵa aıryqsha úles qosasyzdar dep úmittenemin. Bizdiń maqsatymyz – ashyq naryqtyq ekonomıkany damytý. Shetelden ınvestısııa kelýine múddelimiz. Qazaqstan basty halyqaralyq qarjy ınstıtýttarymen jáne uıymdarmen tyǵyz baılanys ornatqan», dedi Memleket basshysy.
Is-shara sońynda Qasym-Jomart Toqaev elshilerge tabys tilep, olardyń memleketter basshylaryna izgi sálemin joldady.
