Kúzgi áýen áýeledi

«Kúzgi áýen» atty onlaın-konsert talantty, kásibı mýzykanttardyń basyn qosty. Qobyz, vıolonchel, fortepıano syndy aspaptyq trıosy Abaıdyń «Jelsiz túnde jaryq aı», halyq týdyrǵan «Iаpýraı» ánderin túrlendire oryndap, tyńdarmannyń kókiregine jańa tynys syılady. 

Atalǵan keshte óner kórsetken Áıgerim Mataeva – Qazaqstan, Reseı jáne Fransııa elderinde ótken halyqaralyq baıqaýlarynyń laýreaty, pıanıst jáne konsertshi. Ol Qa­zaq­stan, Reseı, Fransııa jáne Shveısarııa elde­rinde jeke óner kórsetip, Erık Le Saj, Igor Lazko, Valerıı Sokolov jáne taǵy bas­qa ataqty mýzyka sheberleri uıymdastyrǵan sheberlik sabaqtaryna qatysqan. Qazirgi ýaqytta Áıgerim  – Skrıabın atyndaǵy konservatorııada sabaq beredi jáne Fransııadaǵy «Qorqyt-Abaı» qazaq mádenı ortalyǵynyń birlesken qalaýshysy. Al qazaq halyq aspaptarynyń mýzykanty Áıgerim Ersaıynova – «Qorqyt ata», «Astana Mereı» jáne ózge de baıqaýlarda jeńiske jetip, ulttyq jáne halyqaralyq deńgeıde mádenı yntymaǵymyzdy jarastyryp júrgen jan. Jastaıynan án-kúıge yntyq bolyp ósken 14 jasar Maksım Grızard Sen-Jermen-an-Le qalasynyń konservatorııasyndaǵy Kler Opperdiń shákirti, 2019 jyly tórt jyldyq jeke oqýynan keıin «Mýzykalyq izdenis» salasyndaǵy dıplomǵa ıe boldy. Jerom Perno, Oleg Kogan jáne Vladımır Perlenderdiń vıolonchel salasynda keńes aldy. Rústem Saıtqulovtan fortepıano salasynda bilim alǵan talantty óren Fransııa, Germanııa, Ulybrıtanııa, Italııa, Chehııa jáne Belarýs elderinde jeke konsertterin berip jatyr. Maýsymdyq baǵdarlama buǵan deıin mýzyka salasyna tyń jańalyǵymen kelgen «MEJ – modern etno-djaz» baǵytynda áýender shyǵaryp jatqan «Steppe Sons» tobynyń, «Otyrar sazy» akademııalyq folklorly-etnografııalyq orkestriniń, dástúrli án-kúı, jyrlarymyzdy dáripteıtin «Halyq qazynasy» bóliminiń konsertin kóp nazaryna usyndy.