JUMYLA QYZMET ETÝ – NYSANA

Qazaqstan musylmandary dinı basqarmasy men Orta Azııa múftıler keńesiniń tóraǵasy, Bas múftı sheıh Ábsattar qajy Derbisáli hazret Qazaq­standaǵy Mıtropolıttik aımaqtyń jańa basshysy, Astana jáne Almaty arhıepıskopy Aleksandr bastaǵan delegasııany olardyń ótinish­teri boıynsha qabyldady. Dinbasy Qazaqstandaǵy jalpy dinı ahýal, ulttar men ulystar, dinder­­aralyq dostyq pen syılastyq, yntymaq jaıly sóz etti. Qazaq eliniń ıslam órkenıetiniń bir ból­shegi ekenin, respýblıka halqynyń 70%-y ıslam dinin ustana­tynyn, qalǵan 30%-y hrıstıan dinin­degi orys, ýkraın, nemis jáne t.b. ulttar men ulys­tardan tura­tyn azamattardyń ózara syı­lastyq pen dos­tyq­ta, yntymaq pen aýyzbirlikte ómir súrip otyr­­ǵanyn, Nur-Múbárak Egıpet ıslam mádenıeti ýnı­ver­sıteti men 7 medrese jumys istep jatqanyn aıtty. Arhıepıskop Qazaqstannyń egemendik alǵaly beri qol jetkizgen jetistikteri men Prezıdent N.Á.Na­zarbaevtyń jetekshiligimen az ýaqytta álemdik qoǵamdastyqtan ózine laıyq oryn alǵanyn tilge tıek etti. Ol Qazaqstan Prezı­denti­ men Dinbasynyń ulttar men ulystar, din­der­ara­lyq dostyq pen yntymaq, syı­lastyqqa úlken mán berip otyr­ǵanyn joǵary baǵalaıtynyn málimdedi. Qazaqstanda tarıhı qalyptasqan ıslam men pravoslavıe dinı basshylary arasyndaǵy túsinistik pen syılastyqty eldiń turaqtylyǵy men beıbit damýyna jumsaıtynyn bildirdi. Bas múftı sheıh Ábsattar qajy Derbisáli 2003, 2006 jáne 2009 jyldary Astanada ótken Álemdik jáne dástúrli dinder kóshbasshylary­nyń sezderi jáne olardyń mán-mańyzyna toq­tal­dy. Arhıepıskop Qazaqstannyń bas qalasyn­da el Prezıdentiniń uıy­t­qy bolýymen ótken bul is-sharalarǵa qyzyǵýshylyq tanytty. Sony­men qatar, kópultty, kópkon­fessııaly Qazaq­stan sııaqty keń-baıtaq elde etnosaralyq tatý­lyq­ty, rýhanı turaq­ty­lyqty, beıbitshilik pen yntymaqty saqtap otyrǵan memleketimizdiń damý deńgeıine joǵary baǵa berdi. Ushyrasýda eki din arasyndaǵy dástúrli dinı yntymaqtastyq pen áriptestik máselesi sekildi jáıtter ortaq áńgimege ózek boldy. Qazaqstandaǵy basty eki dinbasylary elimiz halqynyń birligi men yntymaǵyn, tatýlyǵy men syılastyǵyn budan da bıik belesterge kóterý úshin jumyla qyzmet etýdi nysanaǵa ala bermek bolyp kelisti. Kezdesý sońynda eki jaq syı almasty, dep habarlady Qazaqstan musylmandary dinı basqarmasynyń baspasóz qyzmeti.