Erekshe kútimdi qajet etetin oqýshy Farabı Samalıkov dosy Muhtar Orazbaımen birge aıaq-qoldy ońaltýǵa arnalǵan jattyǵý quralyn oılap tapty. Ekeýi «FM Team» komandasyn quryp, Nursultan Nazarbaev Qory uıymdastyrǵan robottehnıkadan «KazRoboProject» jas konstrýktorlar baıqaýyna qatysyp, jeńimpaz atandy.
О́z ónertabysynyń máni men qoldanystaǵy mańyzy jaıynda Farabı Samalıkov bylaı deıdi: «Erekshe qajettilikteri bar adamdar úshin trenajer jasaý ıdeıasy kezdeısoq kelgen joq. Men ózim sal aýrýyna shaldyqqandar qatarynanmyn. Sondyqtan men ózim sııaqty jáne basqa aýrýlardan zardap shegetin adamdar úshin jattyǵýdyń qanshalyqty mańyzdy ekenin bilemin».
Onyń aıtýynsha, olardyń belsendi jáne passıvti trenajeryn únemi qoldaný bulshyqet atrofııasyn tómendetýge, fızıkalyq kúshti arttyrýǵa kómektesedi. Qurylǵy basqa elderge qaraǵanda áldeqaıda arzan. Al Qazaqstanda mundaı qurylǵyǵa suranys kóp. Aıta ketý kerek, Farabı men Muhtar trenajerdyń modelin jasap qana qoımaı, ony jan-jaqty synaqtan ótkizýdi de oılastyrǵan.
– Damý jospary daıyn tur. Onyń júzege asýyn 4 kezeńge bóldik. Birinshi kezeńde prototıp jasaımyz. Ekinshi kezeńde alǵashqy synaqtan ótedi. Budan ári anyqtalǵan eskertýlerdi eskere otyryp, tehnologııany jetildirý jumystary júrgiziledi. Al testileýdi Atyraýdaǵy «Bolashaq» ońaltý ortalyǵynyń bazasynda ótkizemiz dep otyrmyz. О́mirde kez kelgen nárse bolýy múmkin, biraq úmitińizdi úzbeńiz. О́ıtkeni adam aldynda úlken maqsat qoıýy kerek. Osy nárse kez kelgen qıyndyqty jeńip shyǵýǵa kómektesedi, – deıdi Farabı.
