Ońtústik Qazaqstan • 25 Qarasha, 2020

Shymkentte Súgir Áliulynyń eskertkishi ashyldy

57 ret kórsetildi

Úshinshi megapolıste shertpe kúıdiń sheberi Súgir Áliulynyń eskertkishi ashyldy. Osynaý eskertkishtiń ornatylýyna zańger Beket Turǵaraev bastaǵan bastamashyl top muryndyq bolǵan. Nobaıyn jasap, ornatqan shymkenttik músinshi Ábdikárim Ahmetov bolsa,  kásipker Amangeldi Maqashov demeýshilik kórsetken, dep habarlaıdy Egemen.kz

Súgir Áliulynyń eskertkishin Shymkent qalasyna ornatýǵa usynys bergen bastamashyl toptyń sheshimin qala ákimi Murat Áıtenov qoldaǵan. A.Baıtursynov kóshesiniń boıynan ornatýǵa sheshim qabyldap, Mádenıet jáne sport mınıstrligi janyndaǵy monýmentti eskertkishterdi ornatý komıssııasyna usynys berilgen. Komıssııanyń qoldaý sheshimin alǵan soń, eskertkish óz tuǵyryna qondyrylyp otyr. Kıeli dombyrany jan-tánimen uǵyp, ómirine arqaý etken dalanyń daraboz kúıshileriniń biri – Súgir Áliulyna arnalǵan eskertkishtiń ashylý rásimine Shymkent qalasy ákiminiń birinshi orynbasary Shyńǵys Muqan jáne zııaly qaýym ókilderi qatysty.

"Súgir babamyzǵa qalamyzdyń ádemi jerinen eskertkish qoıyldy. Bul tek kúıshi Súgirge emes, qazaq ónerine qoıylǵan eskertkishtiń biri dep aıtsaq artyq emes. Babamyzdyń bul eskertkishi barsha ónersúıer qaýym men tyńdarmandar úshin, onyń ishinde Shymkenttiń turǵyndary úshin úlken maqtanysh dep aıtýǵa bolady. Uly dalamyzda esimi elge belgili úsh Súgir bolsa, onyń biri qazynaly Qarataýdyń qushaǵyndaǵy Sozaqtyń ulany Súgir Áliuly edi. Onyń ómirge ákelgen "Telqońyr", "Bozingen" atty áıgili kúıleri Sozaq halqynyń turmys-tirshiligin baıqatady. Budan bólek, "Qarataý shertpeleri" atty sıkldi shyǵarmalary tyńdaǵan jannyń boıyna qýat, júregine shýaq beredi. Biregeı týyndylar ǵana tyńdarmannyń júregin jaýlaı alatynyn taǵy da jan-tánimizben sezinip, júregimizben moıyndaımyz. S.Áliuly qaıtalanbaıtyn týyndylarynan bólek, úzdik shákirtterge de baı", dedi Shyńǵys Jumabekuly.

1961 jyly Sozaq jerinde qaıtys bolyp, Qarabýra áýlıe jatqan qorymǵa jerlenip, kesenesi turǵyzylǵan Súgir Áliulyn máńgilik este saqtaý baǵytynda  óńirde birshama jumystar atqarylǵan. Mysaly, Sozaqta batyrlar alleıasyna eskertkish músini qoıylǵan, aýdandaǵy orta mektep Súgirdiń atymen atalady. Al Shymkent qalasyndaǵy Shámshi Qaldaıaqov atyndaǵy fılarmonııanyń janyndaǵy orkestrge Súgir aty berilgen. Jıynda sóz alǵan Beket Turǵaraev osy taqylettes jumystar jalǵasyn tabatynyn aıtty.

Sońǵy jańalyqtar

Elimizde taǵy 1050 adam indetten aıyqty

Koronavırýs • Búgin, 09:44

Semeıge Saqtaǵanov ákim boldy

Taǵaıyndaý • Keshe

Birneshe oblysta jol jabyldy

Qazaqstan • Keshe

Uqsas jańalyqtar