Almatyda 300-dan astam joba júzege asady

Aımaqtar • 26 Qarasha, 2019

Qala turǵyndary tańdaǵan 300-dan asa joba júzege asady

40 ret kórsetildi

Almatyda «Bıýdjetke qatysý» qalalyq jobasy aıasynda osy jyldyń tamyz aıynda abattandyrý boıynsha turǵyndardyń usynystaryna daýys berý bastalǵan bolatyn. Endi osy usynystardyń qorytyndysy jarııalanyp otyr.

Elvıra SERIKQYZY

Qala turǵyndarynyń usynystary budget.open-almaty.kz portaly arqyly qabyldanǵan. 11-23 qarasha aralyǵynda ótken daýys berý kezinde qala turǵyndary úzdik usynystardy ózderi anyqtady. Daýys berý budget.open-almaty.kz portalynda ESQ nemese JSN (SMS-kod) paıdalaný arqyly onlaın, sondaı-aq aýdandyq ákimdikter men Open Almaty front-ofısinde (Abaı dańǵyly, 90) jazbasha daýys berý túrinde ótkizildi.

Portalǵa turǵyndardan 795 jobalyq usynys túsip, onyń 448-i daýysqa salynǵan. Nátıjesinde 28 576 almatylyq daýys berse, onyń 27 476-sy onlaın, 1113-i jazbasha túrde berilgen. Osylaısha, «Bıýdjetke qatysý» aıasynda 2021 jyly 343 joba iske asatyn bolady (Almaly aýdany - 73, Naýryzbaı aýdany – 61, Túrksib aýdany – 54, Bostandyq aýdany – 49, Medeý aýdany – 34, Alataý aýdany – 31, Áýezov aýdany – 22, Jetisý aýdany – 19).

Qala turǵyndarynyń eń kóp daýys jınaǵan jobalary qatarynda: Bostandyq aýdanynda №3 oqýshylar úıiniń aýmaǵyn abattandyrý (458), Alataý aýdanynda «Atletter qalashyǵy» TK aýmaǵyn abattandyrý (424), Almaly aýdanynda Shevchenko kóshesi, 167 mekenjaıyndaǵy aýlany jańartý jáne kógaldandyrý (387), Medeý aýdanynda №168 mektepke ótý úshin Ábilǵazy ózeni arqyly jaıaý júrginshiler kópiri men pandýsy bar baspaldaq salý (349), Túrksib aýdanynda «Qazaqstan jastaryna patrıottyq tálim berý» taqyrybyna mýral salý (325), Áýezov aýdanyndaǵy «Mamyr-1» yqshamaýdanynda balalar oıyn alańyn kúrdeli jóndeý (147), Naýryzbaı aýdanyndaǵy Tastybulaq yqshamaýdanynda jol boıynda jabyq aryq júıesin ornatý (132), Jetisý aýdanyndaǵy Kókjıek yqshamaýdanynda Jekpe-jek ortalyǵyn ashý (112) bar.

Almaty qalasy Qoǵamdyq keńesiniń músheleri turǵyndardyń daýysyn sanap, bastamalarǵa óz baǵasyn berdi. Qoǵamdyq keńes múshesi Murat Ábdishúkirovtiń aıtýynsha, «Bıýdjetke qatysý» jobasy boıynsha qaǵaz túrinde daýys berý nátıjesin sanaýǵa bir kún ketti. Bul turǵyndar óz aýdanyn abattandyrý úshin daýys berýge belsendi qatysqandyǵyn bildiredi. Osy oraıda turǵyndardyń pikirin eskere otyryp, qalany damytý úshin «Bıýdjetke qatysýdy» turaqty túrde ótkizý kerek. Tájirıbe kórsetkendeı, qala turǵyndarynyń belsendiligi men jobaǵa degen qyzyǵýshylyǵy jyl saıyn artyp keledi.

Almaty qalasy Bostandyq aýdany múgedekter qoǵamynyń basqarma tóraǵasy Ulan Ińkárbekov turǵyndardyń belsendiligi artqanyn atap ótip, ár aýdanda orta eseppen 100 jobadan usynylǵanyn jetkizdi. Sonyń ishinde daýys berýge qala turǵyndaryna qajet jáne eń mańyzdy jobalar jiberildi.

Almaty qalasy Qoǵamdyq keńesiniń sarapshysy Dmıtrıı Vasılevtiń pikirinshe, «Bıýdjetke qatysýdyń» kategorııalaryn kóbeıtip, abattandyrýdan bólek, áleýmettik nysandardy, demalys ortalyqtaryn ashý múmkindigin qarastyrý qajet.

Almaty qalasynyń ákimdigi 2019 jyly «Bıýdjetke qatysý» pılottyq jobasyn júzege asyrǵan bolatyn. Bul jobalarǵa qalanyń 8 aýdanyna jergilikti bıýdjetten 500 mln teńgeden bólingen. Bıylǵy jyly bul kórsetkish 6,4 mlrd teńgege deıin ósip (2019 jyly 4 mlrd teńge), ár aýdanǵa shaqqanda 800 mln teńgeden keledi. Qalaǵa qosylǵan aýmaqtardy damytý maqsatynda «Bıýdjetke qatysý» aıasynda Naýryzbaı jáne Alataý aýdandaryna 500 mln teńgeden bólý qarastyrylǵan. Osylaısha, atalǵan eki aýdannyń árqaısysyna 1,3 mlrd teńgeden bólinetin bolady.

ALMATY

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz